ԱՄՆ նախագահիՙ Կուբա կատարած պատմական այցի ժամանակ, երբ իր ամերիկացի գործընկերոջն ընդունել էր Կուբայի առաջնորդ Ռաուլ, իհարկե, Կաստրոն, ԱՄՆ նախագահը փորձել է տեսախցիկների առջեւ էլ ավելի պատմական դարձնել առանց այդ էլ պատմական պահը եւ գրկել է Ռաուլ Կաստրոյին: Սակայն Կուբայի առաջնորդը բռնել է ԱՄՆ նախագահի ձեռքըՙ այդպիսով թույլ չտալով գրկել իրեն:
Արդեն հաջորդ օրը Օբաման Արգենտինայում էր, որտեղ նրա եւ ԱՄՆ առաջին տիկնոջ պատվին ընթրիք է մատուցվել, հենց որի ժամանակ էլ արգենտինական տանգո պարող պրոֆեսիոնալ զույգը Օբամա ամուսիններին հրավիրել է տանգոյի: ԱՄՆ նախագահը պարել է գեղեցկուհի արգենտինուհու հետ, իսկ վերջինիս զուգընկերըՙ գեղեցկուհի տիկին Օբամայի հետ: Այսպիսով այդ երկրում ԱՄՆ նախագահը հասավ իր ուզածին, նրան այդուհանդերձ գրկեցին:
Բայց եթե ձեզ մի տեղ չեն գրկում, իսկ մեկ այլ տեղում էլ նետվում են ձեր գիրկն ու տանգո պարում, դեռ չի նշանակում, որ դուք ԱՄՆ նախագահն եք:
