Կառավարությունը երեկ հավանություն տվեց «Հայաստանի Հանրապետության եւ Եվրոպական ներդրումային բանկի միջեւ 2015թ.հոկտեմբերի 16-ին ստորագրված «Երեւանի կոշտ թափոններ` փուլ 1» ֆինանսական պայմանագրին: Ըստ հիմնավորման, ԵՆԲ-ն ծրագրի 1-ին փուլի ֆինանսավորման նպատակով ՀՀ-ին կտրամադրի 8 մլն եվրո գումարի չափով վարկ: Ծրագրի երեք բաղադրիչներն ուղղված են Երեւանի կոշտ կենցաղային թափոնների կառավարման համակարգի բարելավմանը: Առաջին բաղադրիչը նոր սանիտարական աղբավայրի առաջին երկու գոտիների եւ օժանդակ ենթակառուցվածքի կառուցումն է: Նոր աղբավայրը, որը տեղակայվելու է Նուբարաշենում գործող աղբավայրի հարեւանությամբ եւ գտնվելու է Երեւանի կենտրոնից 12 կմ հեռավորության վրա, կնվազեցնի գործող ոչ սանիտարական աղբավայրի անբարենպաստ ազդեցությունը շրջակա միջավայրի, հանրային առողջության եւ կլիմայի վրա: Ծրագրի երկրորդ բաղադրիչն ընդգրկում է գործող աղբավայրի փակումը եւ վերականգնումըՙ նոր աղբավայրը շահագործման հանձնելուց հետո: Ծրագրի երրորդ բաղադրիչը կնպաստի այնպիսի համակարգերի եւ օբյեկտների նախապատրաստմանը եւ ներդրմանը, որոնք կավելացնեն վերամշակման ծավալըՙ երկարացնելով նոր աղբավայրի օգտակար շահագործման ժամկետը: Ծրագրի 1-ին բաղադրիչի ընդհանուր արժեքը կազմում է 24 մլն եվրո, որից` 8 մլն եվրո վարկ ԵՆԲ-ից, 8 մլն եվրո վարկ` Վերակառուցման եւ զարգացման եվրոպական բանկից (ՎԶԵԲ), եւ եւս 8 մլն եվրո դրամաշնորհ նախատեսվում է ներգրավել ԵՄ Հարեւանության ներդրումային գործիքի միջոցով:
Կառավարության նիստում նաեւ հավանության արժանացավ «Հայաստանի Հանրապետության եւ Վերակառուցման եւ զարգացման եվրոպական բանկի միջեւ 2015թ. դեկտեմբերի 11-ին ստորագրված «Երեւանի կոշտ թափոնների ծրագիր» վարկային համաձայնագիրը:
