Բելմոնտի (Մասաչուսեթս) «Հայկական ուսումնասիրությունների եւ հետազոտությունների ազգային ընկերության» NAASR կենտրոնում հունվարի 28-ին ամերիկացի պատմաբան Քիթ Դեյվիդ Ուոտենպոն ներկայացրել է իր նոր «Քարից հաց: Մերձավոր Արեւելքը եւ արդի մարդասիրության ձեւավորումը» («Bread from Stones: The Middle East and the Making of Modern Humanitarianism») գիրքը, որտեղ քննության առնելով մարդու իրավունքների պատմության մեջ կարեւոր դեր ունեցած 20-րդ դարի սկզբնական շրջանում կատարված զանգվածային բռնություններն ու պարտադրված տեղահանությունները, այդ թվում նաեւ Հայոց ցեղասպանությունը Օսմանյան Թուրքիայում, նա կենտրոնացել է «Near East Relief» ընկերության նման նպաստամատույց կազմակերպությունների հայ որբերին ցուցաբերած մարդասիրական օգնության եւ սփյուռքահայ համայնքների կազմավորման վրա:
Ուոտենպոն (Keith Watenpaugh) արդի իսլամի, մարդու իրավունքների եւ խաղաղության հարցերի գծով պրոֆեսորի օգնական է եւ դասավանդում է UC-Davis կրթօջախի կրոնական ուսումնասիրությունների ծրագրերի բաժնում: Հեղինակ է բազմաթիվ հոդվածների, որոնք տպագրվել են American Historical Review, The International Journal of Middle East Studies եւ այլ պարբերականներում:
Վերոնշյալ դասախոսությունը հովանավորել են «ՆԱԱՍՐ» կենտրոնն ու Կլարք համալսարանի «Ողջակիզման եւ ցեղասպանության ուսումնասիրությունների Ստրասլեր կենտրոնը»:
