ՀԱՄԱՆԱԽԱԳԱՀՆԵՐ-ՆԱԼԲԱՆԴՅԱՆ ՀԱՆԴԻՊՈՒՄ ՄՅՈՒՆԽԵՆՈՒՄ

Մյունխենում տեղի ունեցող Անվտանգության միջազգային համաժողովի շրջանակում Հայաստանի արտգործնախարար Էդուարդ Նալբանդյանն այսօր հանդիպելու է Մինսկի խմբի համանախագահներին: Հանդիպման ընթացքում հավանաբար քննարկումների առարկա է դառնալու հայ-ադրբեջանական սահմանի շփման գծի լարվածությունը եւ այն նվազեցնելու մեխանիզմները: Հետաքրքրական է, որ այս հանդիպման նախօրեին արտահայտվել է Հայաստանում ԱՄՆ դեսպան Ռիչարդ Միլզը: Հիշեցնելով կողմերին ուղղված համանախագահների` լարվածությունից զերծ մնալուց կոչը, նա հետաքրքրկան դիտարկում է արել.«Շփման գծում բռնության աճը եւ ռազմական հռետորաբանությունը ԱՄՆ կառավարության համար մտահոգվելու լուրջ առիթ է: Ես իրատեսական եմ համարում մեկ սխալի հետեւանքով իրավիճակի լարվածության ուժեղացումը», ասել է նա` իրադրությունը մոնիթորինգի ենթարկող մեխանիզմների կիրառման անհրաժեշտության մասին շեշտելով: Իսկ թե արդյոք այս հանդիպման ընթացքում Ադրբեջանն էլի՞ համը կհանի` սա էլ համաժողովի երկու օրերին (այսօր եւ վաղը) պարզ կլինի: