Ստամբուլի իրավապահ մարմինները քննություն են սկսել CNN Turk հեռուստաալիքի լրատվական ծրագրի գլխավոր խմբագրի եւ պրոդյուսերի նկատմամբ, որոնք հրապարակել էին նախագահ Էրդողանին ընդդիմության հասցեագրած մեղադրանքները: Այդ մասին հաղորդում է «Հյուրրիեթ» թերթը:
Լրագրողների նկատմամբ քննությունը սկսվել է այն բանից հետո, երբ լուրերի թողարկման ժամանակ վազող տողով սփռվել են ընդդիմադիր Ժողովրդա-հանրապետական կուսակցության առաջնորդ Քեմալ Քըլըչդարօղուլի խոսքերը:
Հունվարի 18-ին Էրդողանը դատի էր տվել Քըլըչդարօղուլին, ով նախագահին անվանել էր բռնապետ եւ մեղադրել էր կոռուպցիայի հանդեպ թողտվության մեջ: Անկարայի դատախազությունը ընդդիմադիր գործչի նկատմամբ քննություն էր սկսել երկրի նախագահին վիրավորելու մեղադրանքով:
Թուրքական օրենսդրության համաձայն, նախագահին հրապարակայնորեն վիրավորելը համարվում է քրեապես պատժելի հանցագործություն եւ պատժվում է մինչեւ 4 տարվա բանտարկությամբ:
Հունվարի 15-ին ահաբեկչության տարփողման ամբաստանությամբ կարճատեւ կալանքի էին ենթարկվել 27 գիտնականներ, ովքեր հակաքրդական արշավը դադարեցնելու հանրագիր էին ստորագրել: Ինչպես գրել էինք, Էրդողանն անտեսել էր շուրջ 1400 ստորագրություն պարունակող փաստաթուղթը:
