Ի՞նչ դժվարությունների առաջ են կանգնում սփյուռքի հայ երիտասարդները: Լոս Անջելեսի խայտաբղետ ներգաղթյալների շրջապատում ինչպե՞ս դիմակայել հայ մնալու, ամերիկյան ապրելակերպին ինտեգրվելու, եւ հանցագործ խմբավորումներին չհարելու խնդիրները:
Նման բազմաթիվ այլ հարցեր քննարկվել են հոկտեմբերի 18-ին, Գլենդեյլի «Փեսիֆիկ Թեաթըրզի» դահլիճում: Հարավային Կալիֆոռնիա համալսարանի հայագիտական Ուսումնասիրությունների ինստիտուտի կազմակերպած բանավեճը կլոր սեղանի շուրջ է հավաքել փորձագետների, որոնք մտքեր են փոխանակել «դժվարին խոսակցությունՙ մասնակիորեն համընկնող ինքնությունների, սփյուռքում պատանի ներգաղթյալ եւ հանցագործ խմբի անդամ լինելու» թեմայի շուրջը:
Բանավեճից առաջ ցուցադրվել է ռեժիսոր Քրիսթոֆեր Չեմբըրզի «Արամ, Արամ» գեղարվեստական ֆիլմը, որի մասին «Ազգը» գրել էր նախորդ համարներից մեկում: Համալսարանի հայագիտական Ուսումնասիրությունների ինստիտուտի տնօրեն Սալփի Ղազարյանը հարցազրույց է ունեցել ֆիլմի ռեժիսորի եւ Համալսարանի ծրագրերի տնօրեն Արա Արզումանյանի հետ: Միջոցառման ավարտին կազմակերպվել է ընդունելություն «Ֆեյմըս» ռեստորանում:
Տեղեկացնենք, որ վերոնշյալ համալսարանի հայագիտական ուսումնասիրությունների կենտրոնը հիմնվել է 2005 թվականին:
