«Հայփոստ» ՓԲԸ, «Հայփոստ Թրասթ Մենեջմենթ» ԲՎ
Համաշխարհային փոստային միությունը, որի անդամն է հանդիսանում Հայաստանի Հանրապետությունը, յուրաքանչյուր տարի հայտարարում է նամակագրության միջազգային մրցույթ, որի միջոցով լրացուցիչ քայլ է արվում խթանել աշխարհում նամակագրության դերը:
Այս տարի անց է կացվել 44-րդ նամակագրության միջազգային մրցույթը, որի թեման էրՙ «Այն աշխարհը, որտեղ ես կուզեի մեծանալ», որին մասնակցել են 9-15 տարեկան աշակերտները:
Մասնակցելով մրցույթին, Հայաստանի «Հայ կրթություն» կրթահամալիրի 8-րդ դասարանի աշակերտուհի Տաթեւ Բարսեղյանը արժանացավ միջազգային ժյուրիի հատուկ հավաստագրին:
Հոկտեմբերի 9-ին, փոստի միջազգային օրվա կապակցությամբ, Հայփոստի Նոր տեխնոլոգիաների զարգացման եւ ուսուցման կենտրոնում տեղի ունեցավ հավաստագրի հանձնման պաշտոնական արարողությունը: Հավաստագիրը Տաթեւին հանձնեց «Հայփոստ թրասթ մենեջմենթ» ԲՎ գլխավոր տնօրեն Խուան Պաբլո Գեչիջյանը:
Այս կապակցությամբ մարվեց եւ շրջանառության մեջ մտցվեց «Հեռահաղորդակցության միջազգային միության 150-ամյակը» թեմային նվիրված նամականիշով բացիկը: Մարման արարողությանը մասնակցեց նաեւ շնորհալի աշակերտուհին:
