Կալիֆոռնիայից դեմոկրատ պատգամավոր Ադամ Շիֆը հայտարարել է, որ նախաձեռնել է շրջաբերական նամակով դիմել Նոբելյան մրցանակներ շնորհող հանձնախմբինՙ առաջադրելով Հռոմի Ֆրանսիս պապի թեկնածությունը 2016 թվի խաղաղության Նոբելյան մրցանակին:
«Ֆրանսիս պապը հզոր ջատագով է խաղաղության, պահանջում է վերջ դնել հակամարտություններին եւ պաշտպանում է փոխշահավետ հարաբերությունները երկրների միջեւ: Նա կոչ է անում աշխարհին ուժի, բռնադատության եւ ահաբեկչության փոխարեն օգտագործել դիվանագիտական ուղիները լուծելու համար ամեն տեսակի վեճերը:
Նա նաեւ կոչ է անում միջազգային հանրությանը զորակոչի ենթարկելու իր ուժերըՙ դիմագրավելու համար առավել գլոբալ խնդիրներ, ինչպիսիք են կլիմայական եւ շրջակա միջավայրի փոփոխությունները: Եվ վերջապես Ֆրանսիս պապը մարդու իրավունքի պաշտպանի իր խիզախ կեցվածքով եւ բոլորՙ անցյալի եւ ներկայի ցեղասպանությունների դատապարտումով առանձնացրել է իրեն այլ գործիչներից: Այս եւ բազմաթիվ ուրիշ պատճառներից ելնելով մենք առաջարկում ենք նրա թեկնածությունը 2016 թվի խաղաղության Նոբելյան մրցանակի համար», ասված է Ադամ Շիֆի շրջաբերական նամակում, որն ուղարկվել է ստորագրահավաքի Մ. Նահանգների կոնգրեսի ինչպես դեմոկրատական, այնպես էլ հանրապետական պատգամավորներին:
