Սեպտեմբերի 30-ին «Բաղրամյան» զորավարժարանում մեկնարկել են ՀԱՊԿ-ի խաղաղապահ ուժերի` «Անխախտելի եղբայրություն-2015» զորավարժությունները: Զորավարժություններին մասնակցում են կազմակերպության անդամ բոլոր վեց երկրների (Հայաստան, Ռուսաստան, Բելառուս, Ղազախստան, Տաջիկստան, Ղրղզստան) խաղաղապահ ստորաբաժանումների ներկայացուցիչները, թվով` 600 զինծառայող, ավելին քան 50 միավոր ռազմական տեխնիկա, ավիացիոն միջոցներ:
Զորավարժություններին մասնակցելու նպատակով Հայաստան է ժամանել նաեւ ՀԱՊԿ գլխավոր քարտուղարի տեղակալ Վալերի Սեմերիկովը, որը հայտարարել է. «ՀԱՊԿ ուժերը մարտունակ են, ի զորու ապահովել կազմակերպության տարածքի, ինչպես նաեւ անդամ պետություններից յուրաքանչյուրի անվտանգությունը: Ավելին, ՀԱՊԿ խաղաղապահ ուժերը հասել են զարգացման այնպիսի մակարդակի, որ կարող են ավելի լայնածավալ խնդիրներ լուծել, այդ թվում` ՄԱԿ-ի հովանու ներքո»:
