Ամերիակահայ մի շարք կազմակերպությունների ներկայացուցիչներից կազմված մի պատվիրակություն հանդիպում է ունեցել Մ. Նահանգների պետքարտուղարության պաշտոնատար անձանց հետՙ Սիրիայում, Լիբանանում եւ Հայաստանում գտնվող սիրիահայերին ամերիկյան եւ միջազգային օգնություն ցուցաբերելու գործում թերությունները վերացնելու եւ գործնական, առավել արդյունավետ լուծումներ գտնելու նպատակով, տեղեկացնում է Ամերիկայի Հայ ազգային կոմիտեի (Հայ դատի) հաղորդակցությունների բաժնի տնօրեն Էլիզաբեթ Չուլճյանը:
Պետքարտուղարության երեքՙ փախստականների եւ միգրացիայի, Մերձավոր Արեւելյան եւ եվրասիական խնդիրներով զբաղվող բաժանմունքների ներկայացուցիչները մեկժամյա հանդիպման ընթացքում լսել են հայկական կողմի պահանջները եւ վստահեցրել, որ համագործակցելով հայկական կազմակերպությնների հետ մարդասիրական օգնության կառավարական եւ միջազգային ծրագրերը այսուհետ ավելի արդյունավետ ձեւով կհասնեն կարիքավոր սիրիահայերին: Նրանք գոհունակություն են հայտնել ամերիկահայ առաջնորդների հետ հանդիպելու հնարավորության համար եւ ողջունել ամեն տեսակի ստեղծագործական մոտեցում լուծելու համայնքի մտահոգություններն ու խնդիրները:
