Բրիտանական երկու ընկերություններ պայթած ռումբերի տարրալուծման հիման վրա եզրակացրել են, որ «Իսլամական պետության» գրոհայինները քիմիական զենք են օգտագործում մարտերի ժամանակ եւ խաղաղ բնակչության դեմ: Արգելված զենքի օգտագործման բացահայտված դեպքերին վերաբերող հաշվետվությունը հրապարակվել է CNN հեռուստաալիքով:
Conflict Armament Research (CAR) եւ Sahan Research հետազոտական ընկերությունների ներկայացուցիչները ուսումասիրել են «Իսլամական պետության» մարտիկների կողմից օգտագործվող ինքնաշեն պայթուցիկ սարքերը: Վերջին մեկ ամսվա ընթացքում մի խումբ գիտնականներ երեք ուղեւորություն են կատարել պայթյունների վայրեր. երկու անգամՙ Սիրիայի հյուսիս եւ մեկ անգամՙ Իրաքի հյուսիս: Վերջին դեպքում հետազոտության առարկա է դարձել չպայթած 120 միլիմետրանոց արկը:
Իրաքի հյուսիսում գիտնականների գտած արկից արտահոսում էր սուր հոտով, մուգ դեղին ինչ-որ հեղուկ: Արկի մոտ եղած գիտնականների խմբի ներկայացուցչի խոսքերովՙ իրենք զգացել են սրտխառնոց եւ գլխացավեր. այդ ախտանիշներն առաջանում են քլորի ազդեցության հետեւանքով: Հետագա լաբորատոր հետազոտությունները հաստատել են այդ թունանյութի առկայությունը:
Ավելի ուշ Սիրիայի հյուսիսում հայտնաբերված պայթած զինամթերքների բեկորների վրա կար մի քիմիական նյութ, որն առաջացնում է կոկորդի ուժգին ջղակծկումներ եւ աչքերի բորբոքում: Լաբորատոր տարրալուծումը ի հայտ բերեց ֆոսֆին թունանյութի առկայությունը:
Գիտնականների կարծիքով, ստացված արդյունքները խիստ մտահոգիչ են, քանզի ապացուցում են, որ «Իսլամական պետության» ահաբեկիչները ոչ միայն կարողանում են պայթուցիկ սարքեր պատրաստել, այլեւ սկսել են դրանք լցոնել զանազան թունանյութերով: «Եթե նրանք նման կիրառությունն արդյունավետ համարեն, ապա դրան կդիմեն կրկին ու կրկին», կարծում է CAR-ի ներկայացուցիչը:
