Համաշխարհային հայկական կոնգրեսի եւ Ռուսաստանի հայերի միության նախագահ ԱՐԱ ԱԲՐԱՀԱՄՅԱՆ
Խոր ցավով տեղեկացանք ամերիկահայ հայտնի գործարար, մեծ բարերար, Հայաստանի ազգային հերոս Քըրք Քըրքորյանի մահվան մասին:
Անգնահատելի է Քըրքորյանի ավանդը մայր Հայրենիքին ցուցաբերած օգնության, պետական եւ մարդասիրական բազմաթիվ ծրագրերին աջակցության եւ իրագործման հարցում: Սպիտակի երկրաշարժից հետո եւ շրջափակման տարիներին բարերարը մեծապես օգնել է Հայաստանին ու Արցախին: Քըրքորյանի հիմնադրած «Լինսի» հիմնադրամը 2001-ից ի վեր հսկայական միջոցներ է տրամադրել Հայաստանինՙ ճանապարհների վերակառուցման, մշակութային հաստատությունների վերանորոգման, աղետի գոտու բնակարանաշինարարության, Հայաստանում փոքր եւ միջին ձեռներեցության զարգացման համար:
Համաշխարհային հայկական կոնգրեսի, Ռուսաստանի հայերի միության, անձամբ իմ անունից խորին ցավակցություններ եմ հայտնում մեծ բարերարի հարազատներին, մերձավորներին, ողջ հայ ժողովրդին:
