Ամերիկայի «Դրամատիկական արտիստների հայկական միության» (ADAA) համագործակցությամբ երկրի խոշորագույն թատերական ընկերություններիցՙ «Թատերական խմբավորման կենտրոնը» (CTG) ապրիլի 28-ին Լոս Անջելեսի Քըրք Դուգլաս թատրոնում կազմակերպել է «Բեմադրելով անբեմադրելին: Բռնությունը դրամատիկացնելու էսթետիկան» խորագրի ներքո ընթերցում-քննարկումների մի երեկո մասնակցությամբ հայ համայնքի եւ լոսանջելեսյան թատերական աշխարհի ճանաչված օտար ներկայացուցիչների: Միջոցառումը մտահղացել են CTG-ի զարգացման ծրագրի տնօրեն Պիեր Կառլո Տալենտին եւ ADAA-ի նախագահ Բիանկա Պահատուրյանը: Բեմականացումը իրականացրել է Մայքլ Արաբյանը: Ներկայացվել են հատվածներ Լեսլի Այվազյանի «15/15», Սեւան Գալուստյան-Գրինի «Մոռացված հաց» եւ Նիլ Մքֆերսոնի (Լոնդոնի Ֆինբորո թատրոնի գեղարվեստական ղեկավար) «Ցանկանում եմ երգելով մահանալ» պիեսներից: Դերասանական կազմում ընդգրկված են եղել Օսկարի թեկնածու Շոհրե Աղադաշլուն, Սեմ Էնդերսոնը, Քեն Դավիթյանը, Մայքլ Գյուրջյանը, Կարեն Կոնդազյանը, Քրիստինե Քլճյանը եւ Հրաչ Թիթիզյանը: Մասնակցել է նաեւ Լեսլի Այվազյանը:
Ներկայացումներից հետո կայացել է քննարկում «Թատրոնը դերակատարություն ունի՞ պատմական մեղքերը բեմ բարձրացնելու եւ մոռացությունից փրկելու գործում» եւ «Ինչպե՞ս կարող է դրամատուրգը բեմ բարձրացնել նման ողբերգություններ» հարցերի շուրջ: Քննարկմանը իրենց մասնակցությունն են բերել Լոս Անջելեսից հայտնի թատերագետներ Խոսե Լուիս Վենեսուելան, Ջուլի Մարի Մայաթը, Մայքլ Փերեցյանը եւ Վաշինգտոնիցՙ Գրեգ Հիտկելմանը: Որպես համակարգող հանդես է եկել «La weekly» պարբերականի գրաքննադատ Լի Մորիսը:
Միջոցառումը նվիրված է եղել Հայոց ցեղասպանության 100-ամյա տարելիցին:
