Կառավարությունում երեկ ներկայացված Կենտրոնական բանկի 2015 թվականի դրամավարկային քաղաքականության ծրագրի եզրակացության մեջ նշված էր, որ Ռուսաստանում տնտեսական կացության պատճառով հնարավոր է 2015-ին Հայաստանում 2 տոկոս տնտեսական անկում արձանագրվի: Այս գնահատականը քննարկումների տեղիք տվեց: Փոխվարչապետ Վաչե Գաբրիելյանն ասաց, որ դա պայմանավորված է միջազգային որոշ հաստատությունների կանխատեսումներով, համաձայն որոնց Ռուսաստանում 3-5,5 տոկոս անկում կարող է լինել: Ենթադրվում է, որ դա իր ազդեցությունը կունենա մեր տնտեսության վրա:
Սակայն այս գնահատականին չհամաձայնվեց վարչապետ Հովիկ Աբրահամյանը. «Եթե մարդիկ կան, որ կանխատեսումներով, ենթադրություններով են խոսում, մենք խոսում ենք թվերով, եւ հիմնավորում ենք, որ տնտեսական աճ ունենալու ենք: Հիմա ես համոզված եմ, որ 2-3 տոկոս տնտեսական աճ ունենք չորս ամսում, եւ նման դատարկ խոսակցություններին պիտի վերջ տրվի, թե տնտեսական անկում ենք ունենալու եւ այլն: Որոշ քաղաքական ուժեր կամ գործիչներ ցանկություն ունեն, որ կառավարությունը ձախողվի, տնտեսական անկում լինի, բայց ես համոզված եմ, որ իրենց ցանկությունը չի իրականանալու, եւ մենք արձանագրելու ենք տնտեսական աճ»: Ըստ վարչապետի, թեեւ միջնժամկետ ծրագրով 2015 թվականի համար կանխատեսվել էր 1 տոկոս տնտեսական աճ, բայց ինքը վստահ է, որ ավելին է լինելուՙ 2-3 տոկոս:
