ԼՅՈՒՔՍԵՄԲՈՒՐԳԸ ՑԱՆԿՈՒԹՅՈՒՆ ՈՒՆԻ ՊԱՇՏՈՆԱՊԵՍ ՃԱՆԱՉԵԼ ՀԱՅՈՑ ՑԵՂԱՍՊԱՆՈՒԹՅՈՒՆԸ

Անահիտ Հովսեփյան, Գերմանիա

“Լյուքսեմբուրգեր վորթը” ապրիլի 21-ին ծանուցում է, թե Լյուքսեմբուրգի քրիստոնյա սոցիալիստական ժողովրդական կուսակցությունը ցանկություն ունի երկրի խորհրդարան ներկայացնել մի նախագիծ, որով Հայոց կոտորածները կբնորոշվեն ցեղասպանություն բառեզրով։ Դրանով Լյուքսեմբուրգը պաշտոնապես կճանաչի Հայոց ցեղասպանությունը, ծանուցում է հիշյալ աղբյուրըՙ հղում անելով այդ կուսակցության պատգամավոր Լաուրենթ Մոզարի (Laurent Mosar)ՙ երեքշաբթի թվիթթերյան գրառմանը։ Մինչեւ հիմա լյուքսեմբուրգյան քաղաքականության մեջ Հայոց ցեղասպանության ճանաչման հարցը օրակարգային չի եղել։ Երեքշաբթի լրագրողների հետ հանդիպմանը Քսավիե Բեթթելը (Xavier Bettel) մեկնաբանություն չի արել, չի հստակեցրել, թե Հայոց ոճիրը նկարագրելու համար ո՛ր բառեզրը պիտի ընտրենՙ հարցի հասցեատեր համարելով արտգործնախարար Ժան Ասսելբորնին (Jean Asselborn)։