«Տպագիր մամուլն անփոխարինելի է իր բովանդակությամբ, մեծ հնարավորություններով եւ խորը վերլուծությամբ. այն յուրահատուկ դեր ու նշանակություն է ունեցել եւ ունի նաեւ այսօրՙ թվայնացման այս դարաշրջանում»,- «Մանկավարժական համալսարան» պաշտոնաթերթի 50-ամյակին նվիրված միջոցառմանը նշեց ՀՊՄՀ ռեկտոր Ռուբեն Միրզախանյանը :
«Մանկավարժական համալսարան» պաշտոնաթերթը 50 տարեկան է:
Թերթի ծնունդը իրադարձություն էր բուհի կյանքում: Առաջին համարը լույս է տեսել 1965 թվականին, որի առաջին խմբագիրը անվանի լեզվաբան Պետրոս Բեդիրյանն էր, այն ժամանակ Հայկական մանկավարժական ինստիտուտի շրջանավարտ: Ի դեպ, թերթը ձեւավորող նկարիչներից մեկը հայտնի գեղանկարիչ Հրանտ Թադեւոսյանն է, որ նաեւ ձեւավորել էր 1965 թվականի ցեղասպանության 50 ամյակին նվիրված թերթի համարը: Այստեղ են իրենց գրական ուղին հարթել լեզվաբան Պետրոս Բեդիրյանը, գրականագետ Հայկազ Մուրադյանը, անվանի գրողներ Լեւոն Անանյանը, Վանո Սիրադեղյանը, բանաստեղծ Ռազմիկ Դավոյանը եւ ուրիշներ:
«Մանկավարժ» պաշտոնաթերթն ունեցել է 15 խմբագիր, որոնց թվում նաեւ Գրողների միության նախկին նախագահ Լեւոն Անանյանը: Թերթի հոբելյանի առթիվ այսօր կազմակերպված ձեռնարկին ներկա էին թերթի տարբեր տարիների խմբագիրներ, Լեւոն Անանյանի որդինՙ «Արմենպրես» լրատվական գործակալության տնօրեն Արամ Անանյանը, Հայաստանի ժուռնալիստների միության նախագահ Աստղիկ Գեւորգյանը, պրոֆեսորադասախոսական կազմի ներկայացուցիչներ ու հյուրեր:
Բուհի ռեկտորը «Մանկավարժական համալսարան» մեդալով պարգեւատրեց թերթի նախկին խմբագիրներ Պետրոս Բեդիրյանին, Շուշան Դանոյանին, Գոհար Ասիրբեկյանին, ինչպես նաեւ 2003 թվականից մինչ օրս թերթի գլխավոր խմբագիր Սիլվա Ասրյանին:
Ձեռնարկին ներկա Հայաստանի ժուռնալիստների միության նախագահ Աստղիկ Գեւորգյանը չթաքցրեցՙ «Մանկավարժական համալսարան» պաշտոնաթերթը հայ մամուլի պատմության մեջ իր փառավոր տեղն ունի:
Հայաստանի ժուռնալիստների միության նախագահը թերթի գլխավոր խմբագիր Սիլվա Ասրյանին պարգեւատրեց միության բարձրագույնՙ «Հավատարիմ մասնագիտությանը» մեդալով:
