Իսրայելի վարչապետ Բենիամին Նաթանյահուն մարտի 3-ին Վաշինգտոնում կոնգրեսականներին եւ սենատորներին հորդորել է մերժել Իրանի միջուկային ծրագրի հետ կապված համաձայնությունը, որի շուրջ նախագահ Օբամայի վարչակազմը ներկայումս բանակցում է Ժնեւում։ «Դա վատ համաձայնություն է…. Այն ոչ թե կբարելավի Իրանին, այլ ընդհակառակը… Այլընտրանքը ոչ թե պատերազմն է, այլ լավ համաձայնագիրը», հայտարարել է Նաթանյահուն, որի խոսքը մեջբերում է ֆրանսիական «Ֆիգարո» թերթը։ Ըստ որում, դահլիճում թափուր էին 50 դեմոկրատ կոնգրեսականների եւ փոխնախագահ Ջո Բայդենի տեղերը։
Նաթանյահուն ամերիկացի օրենսդիրներին հորդորել է լինել «ուժեղ եւ վճռական»։
Ինչպես նշում է թերթը, նա հերթական անգամ հանդես եկավ որպես մի պետական գործիչ, որի միակ նպատակը Իսրայելի պաշտպանությունն է թշնամի Իրանից։ Մեկնաբանները խոսում են իսրայելա-ամերիկյան հարաբերությունների դրամատիկ եւ պատմական պահի մասին։ Պատմականՙ այն իմաստով, որ Նաթանյահուից առաջ միայն Ուինսթոն Չերչիլն էր արժանացել ամերիկյան Կոնգրեսում երրորդ անգամ ելույթ ունենալու պատվին։
Ներկա պահի դրամատիկ բնույթը պայմանավորված է երկկողմ հարաբերություններում ծագած մեծ լարվածությամբ։ Պատճառն այն է, որ Սպիտակ տունն անտեղյակ էր Նաթանյահուի վաշինգտոնյան այցին. նրան ծածուկ հրավիրել էր Ներկայացուցիչների պալատի հանրապետական առաջնորդ Ջոն Բեյները։ Օբամայի վարչակազմը դատապարտեց Թեհրանի հետ վարվող բանակցությունների վիժեցմանն ուղղված այդ քայլը։ Բանն այն է, որ բանակցությունների ներկայիս փուլն ավարտվում է մարտ ամսին։ «Ես երբեք չեմ տեսել այսքան ողբերգական բան. իսրայելցի դաշնակցի հանդեպ մեր մոտեցման հիմնարար սկզբունքներից մեկը հօդս ցնդեց», ընդգծում է փորձագետ Մարտին Ինդիկը։
Բարաք Օբամայի պաշտոնավարման հենց սկզբից Նաթանյահուն նրա հետ տարաձայնություններ ունի իսրայելա-պաղեստինյան հիմնահարցում։ Նրանց տարաձայնությունները էլ ավելի խոր եւ ռազմավարական բնույթ են կրում Իրանի հարցում։ Օբաման Իսրայելի վարչապետի այցի կապակցությամբ նրան մեղադրել է անտեղի ահազանգ հնչեցնելու եւ ամերիկա-իրանական ժամանակավոր համաձայնագրի առնչությամբ «չստուգված» մռայլ կանխատեսումներ անելու համար։ Նա հայտարարել է, որ Իսրայելի վարչապետը Իրանի միջուկային թնջուկի լուծման վերաբերյալ այլընտրանքային որեւէ լուրջ առաջարկ չի ներկայացրել իր ճառում։
Մյուս կողմից, կոնգրեսում Նաթանյահուի ելույթը բոյկոտած կոնգրեսականներից մեկը քմծիծաղով հաջողություն մաղթեց նրան Իսրայել վերադարձին, ակնարկելով այն փաստին, որ առաջիկայում «Լիկուդ» կուսակցությանը, որի պարագլուխն է Բիբին, սպասում է նախընտրական լուրջ պայքար։
