Արդյունաբերության զարգացման նպատակով կառավարությունը երեկ 601 մլն դրամ պետական աջակցություն տրամադրեց: Ինչպես նշեց էկոնոմիկայի նախարար Կարեն Ճշմարիտյանը, արտահանման քաղաքականության մեջ առաջնահերթ ուշադրություն է դարձվելու արտահանման շուկաների դիվերսիֆիկացմանը, մասնավորապես` նոր շուկաների ձեւավորմանը եւ դրանցում Հայաստանի ապրանքների առաջմղմանը: Նրա հավաստմամբ, ծրագրում ընդգրկվել են ոչ միայն արդյունաբերության արտահանման զարգացման աջակցության ռազմավարությամբ հաստատված են 11 ճյուղերը, այլեւ ողջ վերամշակող արդյունաբերությունը:
էկոնոմիկայի նախարարը կառավարության հաստատմանը ներկայացրեց մեկ այլ նախագիծ` «Զբոսաշրջությանն աջակցության ծառայություններ» 2015թ. ծրագիրը եւ միջոցառումների ժամանակացույցը: Ըստ նախարարի, ծրագրի նպատակն է մարքեթինգային քաղաքականության իրականացման միջոցով նպաստել միջազգային շուկայում Հայաստանի, որպես զբոսաշրջության համար բարենպաստ եւ գրավիչ երկրի նկարագրի ամրապնդմանը, հայկական զբոսաշրջային արդյունքի դիվերսիֆիկացմանը, համայնքներում զբոսաշրջության զարգացմանը, զբոսաշրջային սեզոնի երկարաձգմանը, համաչափ տարածքային տնտեսական զարգացմանը, մարդկային ռեսուրսների զարգացմանը, միջազգային համագործակցության ակտիվացմանը, միջազգային շուկայում հայկական զբոսաշրջային արդյունքի մրցունակության ամրապնդմանն ու բարձրացմանը: Արդյունքում ակնկալվում է հասնել դեպի Հայաստան զբոսաշրջային հոսքերի տարեկան 10 տոկոս աճի տեմպի ապահովմանը:
