Գերմանիայի Քրեական հետախուզական դաշնային գերատեսչությանը Լայպցիգում եւ Պրահայում հաջողվել է 2,3 տոննա Crystal արտադրելու հիմնանյութ առգրավելՙ ձերբակալելով թմրանյութերի արտադրությամբ եւ իրացմամբ զբաղվող մի հանցախմբի, իրազեկում է «Բիլդը» նոյեմբերի 13-ի համարում: Քրեական հետախուզության աշխատակիցների հայտնաբերած սպիտակ փոշին, որ բազմաթիվ պարկեր է լցրել, զբաղեցրել է մի մեծ սրահ: Սա 2,9 տոննա Քլորեֆեդրին է, որից կարելի է ստանալ 2,3 տոննա Crystal թմրանյութ, որի փողոցային առեւտուրը ապահովում է 184 միլիոն եվրոյի եկամուտ:
Հումքի հայթայթմամբ զբաղվել է 32-ամյա քիմիական նյութերի առուվաճառքով զբաղվող մի գերմանացի Լապցիգից: Նրան Գերմանիայում ընկերակցել են Ադրբեջանի մեկ, Հայաստանի 4 քաղաքացիներ եւ մի ուկրաինուհի, որոնք ձերբակալված են: Ոստիկանությունը խուզարկման ժամանակ գտել է դրամ, գողացված փաստաթղթեր, բջջային հեռախոսներ, զինամթերք, զենք:
Քլորեֆեդրինի առեւտուրն արգելված չէ, բայց քիմիական այս նյութի օրինական օգտագործումն արտոնված է միայն հետազոտական աշխատանքի, փորձերի ժամանակ կիրառելու նպատակով: Քրեական հետախուզության դաշնային գերատեսչության նախագահ Յորգ Ցիիրկեի բնութագրմամբՙ«Մետամֆետամինի սպիտակ բյուրեղը կամ ինչպես ժողովրդական տարածված անունն է` Crystal Meth-ը, արագ կախվածություն է առաջացնում եւ ծայրահեղ վտանգավոր է»:
