Թուրքական «Դեյլի Սաբահ» կայքէջը հաղորդում է, որ երկրի դպրոցներում թույլատրվել է կրել իսլամական գլխաշորՙ չարշաֆ: Խոսքը պետական կրթօջախների միայն բարձր դասարանների մասին է: Մասնավոր եւ կրոնական դպրոցներում աշակերտներն առաջվա պես կենթարկվեն դրանց ներքին կանոններին:
Փոխվարչապետ Բյուլենթ Առինչը հայտարարել է, որ կառավարության սեպտեմբերի 22-ի նիստում որոշվել է փոփոխություն կատարել կրթության օրենքում: Ուղղումը վերաբերում է սովորողների եւ ուսուցիչների արտաքին տեսքին: Մինչեւ վերջերս օրենքը նրանցից պահանջում էր պարապմունքների գալ բաց գլխով: Այդ պահանջը հանվել է տեքստից:
Կառավարության նախաձեռնությունն արդեն տարբեր արձագանքներ է առաջացրել թուրքական հասարակության մեջ: Աջամետ կուսակցությունների հետեւորդները ողջունում են օրենքի փոփոխումըՙ դրանում տեսնելով հավատացյալների իրավունքների ընդլայնում եւ պատմական անարդարության վերացում: Ձախերը, սակայն, վախենում են, որ ուղղումը հերթական քայլն է երկիրն իսլամացնելու եւ աշխարհիկ պետության սկզբունքից հրաժարվելու ճանապարհին:
Ռեջեփ Թայիփ Էրդողանի վարչապետության տարիներին նրա չափավոր իսլամիստական կառավարությունը արդեն չեղյալ էր հայտարարել պետհիմնարկներում եւ բուհերում չարշաֆ կրելու արգելքը: Հիմա հերթը հասել է դպրոցների բարձր դասարաններին:
