Գոլանի բարձունքներում տեղաբաշխված ՄԱԿ-ի խաղաղարարները սկսել են լքել Իսրայել-Սիրիա տարանջատիչ գոտում գտնվող իրենց դիրքերը: Այդ մասին հաղորդում է Ռոյթեր գործակալությունըՙ վկայակոչելով ՄԱԿ-ի աղբյուրներ:
ՄԱԿ-ի ուժերի հեռացման որոշումն ընդունվել է Սիրիայի հյուսիս-արեւելքում բնավորված իսլամիստների հետ վերջերս խաղաղարարների ունեցած բախումների կապակցությամբ:
Տարանջատումը դիտարկող ՄԱԿ-ի ուժերի գոտում վերջին օրերին իրավիճակը կտրուկ սրվել է, նշում են ՄԱԿ-ի կենտրոնակայանում: Իսլամիստների զինված խմբավորումները շարժվում են դեպի խաղաղարներրի դիրքերը, եւ ՄԱԿ-ի ուժերը ստիպված տարանջատիչ գոտուց նահանջել են իսրայելական տարածք:
Ավելի վաղՙ օգոստոսի 28-ին, «Ալ Ղաիդայի» հետ կապված խմբավորման գրոհայինները Ալ Կունեյտրայի շրջանում առեւանգել էին ՄԱԿ-ի խաղաղարարների: Անցյալ շաբաթ իսլամիստներն ազատ էին արձակել ֆիջիացի 45 խաղաղարարի:
Գոլանի բարձունքների դիտակետերից մեկում իսլամիստները շրջափակել էին ֆիլիպինցի 72 խաղաղարարի: Օգոստոսի 31-ին հաջողվել էր նրանց դուրս բերել շրջափակումից եւ տեղափոխել Իսրայելի տարածք:
1967 թ. վեցօրյա պատերազմից ի վեր Գոլանի բարձունքները համարվում են Սիրիա-Իսրայել սահմանագծին գտնվող վիճելի տարածք: 1981 թվականին Թել Ավիվը հռչակեց իր ինքնիշխանությունն այդ տարածքի նկատմամբ, սակայն ՄԱԿ-ը մերժեց տվյալ որոշումը:
1974 թվականից Գոլանի բարձունքներում կանգնած են ՄԱԿ-ի խաղաղարարներ, որոնք տարանջատում են սիրիական եւ իսրայելական զորքերը: ՄԱԿ-ի ուժերի պարտականությունն էՙ հետեւել երկու կողմերի հրադադարի պահպանմանը:
Ներկայումս ՄԱԿ-ի ուժերի աձնակազմը ձեւավորվում է Ֆիջիի, Հնդկաստանի, Իռլանդիայի, Նեպալի, Հոլանդիայի եւ Ֆիլիպինների զինծառայողներից: Սակայն անցյալ շաբաթ ՄԱԿ-ը տեղեկացրեց, որ Մանիլան որոշել է իր զինծառայողներին հետ կանչել Գոլանի բարձունքներից, ինչպես նաեւ Լիբերիայից, որտեղ ՄԱԿ-ի ուժերը պայքարում են Էբոլա վիրուսի դեմ:
