Թուրքիայի նախագահ Ռեջեփ Թայիփ Էրդողանը Ֆրանսիայի հետ քննարկում է մեծ հեռահարության պաշտպանական հրթիռահամակարգի ձեռքբերման հարցը: Թուրքական կողմը նախապես պայմանագիր էր ստորագրել Չինաստանի հետ, բայց գործարքը ձախողվել էր տարաձայնությունների պատճառով, տեղեկացնում է «Մոնդ» թերթը: Անցյալ տարի նախապատվությունը տալով China Precision Machinery Import and Export Corp-ին (CPMIEC)ՙ Թուրքիան հիասթափեցրել էր ՆԱՏՕ-ի գծով իր դաշնակիցներին, քանի որ չինական այդ ընկերությունը ԱՄՆ-ի պատժամիջոցների թիրախ էր դարձել Իրանին, ԿԺԴՀ-ին եւ Սիրիային զենք վաճառելու պատճառով:
«Չինաստանի հետ որոշ տարաձայնություններ ի հայտ եկան մասնավորապես պաշտպանական հրթիռահամակարգի համատեղ արտադրության եւ գիտատեխնիկական տեղեկատվության հարցերում», լրագրողներին հայտարարել է Էրդողանը սեպտեմբերի սկզբներին Ուելսում կայացած ՆԱՏՕ-ի գագաթաժողովում: Նա ավելացրել է, որ Չինաստանի հետ քննարկումները շարունակվում են, բայց առքուվաճառքի անցյալ տարվա մրցույթում երկրորդ տեղը զբաղեցրած Ֆրանսիան վերջերս հանդես է եկել նոր առաջարկություններով: «Ներկա փուլում Ֆրանսիայի հետ մեր բանակցությունները շարունակվում են: Մեզ համար համատեղ արտադրությունը անչափ կարեւոր է», ընդգծել է Էրդողանը:
