Սեպտեմբերի 8-ին Մ. Նահանգների սենատի աշնանային նիստերի վերսկսման կապակցությամբ Իլինոյս նահանգից հանրապետական սենատոր Մարկ Քըրքը հինգ կետից բաղկացած հարցաթերթիկ է հանձնել Թուրքիայում Մ. Նահանգների նոր դեսպանի առաջադրված թեկնածու Ջոն Բասին, տեղեկացնում է Ամերիկայի Հայ դատի կոմիտեն: Հարցաթերթիկի նպատակն է անհրաժեշտ հստակություն մտցնել Հայոց ցեղասպանության եւ Թուրքիայի կողմից առգրավված քրիստոնեական եկեղեցիների եւ դրանց ունեցվածքի վերադարձի շուրջ ծավալվող հարցերի վերաբերյալ նրա դիրքորոշումներում:
Հիշեցնենք, որ ամառային արձակուրդից առաջ կայացած լսումների ժամանակ Բասը ոչ ճիշտ եւ խուսափողական պատասխաններ էր տվել եւ նույնիսկ գովաբանել Էրդողանի ապրիլ 23-ի «ցավակցական» բաց նամակը ուղղված հայ ժողովրդին:
