Ռուսական «Նովոստի լիտերատուրի» կայքն օրերս տեղեկացրել է, որ Մոսկվայում առանձին գրքով ներկայացվել է լեգենդար հետախույզ Գեւորգ Վարդանյանի կենսագրությունը: Գիրքը հրատարակվել է «Նշանավոր մարդկանց կյանքը» (”Жизнь замечательных людей”) մատենաշարով, Արտաքին հետախուզության ծառայության (ԱՀԾ) կազմակերպած շնորհանդեսին ներկա են եղել Գեւորգ Վարդանյանի այրինՙ Գոհար Լեւոնի Վարդանյանը, ռուսական հատուկ ծառայությունների ներկայացուցիչներ եւ կինոգործիչներ: Կա տեղեկատվություն, որ հրատարակված նյութը շուտով կէկրանավորվի:
Գրքի հեղինակը ռուս ժուռնալիստ Նիկոլայ Դոլգոպոլովն է, որը շնորհանդեսի ժամանակ նշել է, թե այն, որ ԱՀԾ-ն գաղտնազերծել է Վարդանյանի գործունեության առանձին դրվագներ, արդեն շատ բան է նշանակում: Գրքում մանրամասն նկարագրվում է Գ. Վարդանյանի ու նրա համագործակիցների կյանքն Իրանում եւ նրանց աշխատանքըՙ ուղղված մոլորակի ամենախոշոր ահաբեկչական գործողություններից մեկիՙ Ստալինի, Ռուզվելտի եւ Չերչիլի դեմ դավադրության կանխմանը: Ըստ հիշյալ կայքի, քչերը գիտեն, որ Վլադիմիր Նաումովի եւ Ալեքսանդր Ալովի նկարահանած լեգենդար «Թեհրան 43»-ից բացի գոյություն ունի նաեւ երկու տարի առաջ Վլադիմիր Նախաբցեւի ստեղծած «Ճշմարտացի պատմություն. Թեհրան 43» կինոնկարը: Վերջինս Վարդանյան ամուսինների երիտասարդ տարիների, նրանց համատեղ կյանքի ու համատեղ պայքարի մասին է: Դոլգոպոլովն իր գիրքը գրելու ընթացքում ուսումնասիրել ու ստուգել է նաեւ այս ֆիլմում ներկայացված կենսագրական նյութը:
