Ավստրալացի բժիշկ-գիտնականները հայտարարել են սպիտակարյունության (լեյկեմիա) դեմ փորձարարական դեղի հաջող փորձարկման մասին, տեղեկացնում է «Արմենպրես»-ըՙ հղում անելով ԻՏԱՌ-ՏԱՍՍ-ին:
Ինչպես դեկտեմբերի 11-ին հայտնել է Մելբուռնի ուռուցքաբանական կենտրոնի ղեկավարներից մեկը, ABT-199 դեղի փորձարկման մասնակից է դարձել խրոնիկական լիմֆոցիտար լեյկոզով տառապող 67 մարդ: «Գործնականում նրանք բոլորն էլ անբուժելի հիվանդներ էին, նրանց մնացել էր ապրելու միջին հաշվով 18 ամիս»,- ընդգծել է նա:- Սակայն փորձնական պատրաստուկով գրեթե մեկ տարի շարունակված բուժումից հետո հիվանդների 23 տոկոսը կարողացել է հաղթահարել քաղցկեղը, իսկ 61 տոկոսի մեջ սկսվել է մասնակի ռեմիսիա»:
«Մեր հիվանդների գրեթե մեկ քառորդի մեջ միայն մեկ դեղամիջոցի կիրառումից հետո քաղցկեղային բջիջների նկատմամբ լիակատար հաղթանակը հիրավի անհավատալի բան է»,- ասել է ավստրալացի գիտնականը ABC հեռուստաընկերությանը տված հարցազրույցի ժամանակ:
