Նոյեմբերի 29-ից դեկտեմբերի 4-ը Բրազիլիայում տեղի ունեցած դպրոցական մարզիկների համաշխարհային 13-րդ Գիմնազիադիայում Հայաստանի դպրոցականների մարզական պատվիրակությունը նվաճել է 4 մեդալՙ 1 ոսկե եւ 3 բրոնզե:
Հայաստանի ներկայացուցիչներից պատանի շախմատիստ Մանուել Պետրոսյանն արժանացել է ոսկե մեդալի, լողորդ Վահան Մխիթարյանը, ձյուդոյիստներ Սամվել Խաչատրյանը եւ Գեւորգ Խիթարյանըՙ բրոնզե մեդալների:
«Գիմազիադա-2013» խաղերի ծրագրում ընդգրկված էր 8 մարզաձեւ: Հայաստանի մարզիկները հանդես են եկել 5 մարզաձեւերում` լող, ատլետիկա, մարմնամարզություն, շախմատ եւ ձյուդո: Առաջնությանը մասնակցել են 39 երկրների ներկայացուցիչներ: Հայաստանը մեդալների ընդհանուր քանակով զբաղեցրել է 14-րդ տեղը:
Հայաստանի դպրոցականների հանրապետական մարզական ֆեդերացիան 2011 թվականից Դպրոցականների մարզական միջազգային ֆեդերացիայի լիիրավ անդամ է եւ իրավունք է ստացել մասնակցելու բոլոր միջոցառումներին: Հայաստանի հավաքականն այս տարի առաջին անգամ է մասնակցել դպրոցականների համաշխարհային Գիմնազիադային:
