Երեւանի Հանրապետության հրապարակի հետնամասում, նախկին «Էրեբունի» հյուրանոցի երկրորդ մասնաշենքում, երեկ բացվեց «Հայաթ Փլեյս» հյուրանոցային ցանցին պատկանող նոր` «Հայաթ Փլեյս Երեւան» հյուրանոցը: 10-հարկանի եւ 7 հազար քմ մակերեսով նորաբաց հյուրանոցի շինարարական աշխատանքները մեկնարկել էին 2011-ին, ավարտվել այս տարի, մինչ այժմ ներդրվել է շուրջ 15 մլն դոլար:
Ըստ «Հայաթ Փլեյս Երեւանի» սեփականատեր «Ինտեռարմ-Մ» եւ հյուրանոցի կառավարումն իրականացնող «Հայաթ Հոթելզ Քորփորեյշն» ընկերությունների պատասխանատուների, նոր հյուրանոցում բացվել է 70 աշխատատեղՙ 200 հազար դրամ միջին աշխատավարձով:
Երեւանի կենտրոնում եւս մեկ հյուրանոցի բացման արարողությանը մասնակցեց եւ առաջարկվող պայմաններին ու ծառայություններին ծանոթացավ Հայաստանի նախագահ Սերժ Սարգսյանը:
