Կարագանդայի «Շախտյորը», որի կազմում հանդես է գալիս Գեւորգ Ղազարյանը, ֆուտբոլի Եվրոպայի լիգայի խմբային մրցաշարի 5-րդ տուրում սեփական հարկի տակ 0-2 հաշվով պարտվելով L խմբի առաջատար ՊԱՕԿ-ին, դուրս մնաց հետագա պայքարից: Հույների հետ պայքարը կշարունակի նաեւ հոլանդական «Ալկմարը», որը 2-0 հաշվով հաղթեց Իսրայելի «Մաքաբիին»:
Իսկ ահա «Անժին», որի կազմում է Կառլեն Մկրտչյանը, հաջողությամբ լուծեց հաջորդ փուլ դուրս գալու խնդիրը: «Շերիֆի» հետ խաղն ավարտելով ոչ-ոքի (1-1), «Անժին» 8 միավորով 2-րդ տեղը գրավեց K խմբում: Խմբի հաղթող «Տոտենհեմը» ժամկետից շուտ էր նվաճել 1/16 եզրափակիչի ուղեգիրը: Անգլիական ակումբը հյուրընկալվելիս 2 անպատասխան գնդակ խփեց նորվեգական «Տրոմսեի» դարպասը: Կազանի «Ռուբինն» էլ պաշտոնապես ձեւակերպեց հաջորդ փուլի ուղեգիրըՙ ոչ-ոքի (1-1) խաղալով «Մարիբորի» հետ: 2-րդ ուղեգրի համար պայքարող «Վիգանի» եւ «Զուլտե Վարեգեմի» մրցավեճում 2-1 հաշվով հաղթեցին հյուրերը:
A խմբում հանդես եկող Կրասնոդարի «Կուբանը» սեփական հարկի տակ 4-0 հաշվով ջախջախեց շվեյցարական «Սանկտ Գալենին», որը նախորդ փուլում պայքարից դուրս էր թողել Մոսկվայի «Սպարտակին»: Այս խմբից ուղեգիր նվաճեց «Վալենսիան»ՙ հյուրընկալվելիս 1-0 հաշվով հաղթելով «Սուոնսիին»:
B խմբում ընդգրկված Օդեսայի «Չեռնոմորեցը» 2-1 հաշվով հաղթելով Զագրեբի «Դինամոյին», 7 միավորով հավասարվեց «Էյնդհովենին»: Վերջինս մրցակցի դաշտում զիջեց «Լուդոգորեցին»: Այդ հաղթանակի շնորհիվ բուլղարական ակումբը մտավ հաջորդ փուլ:
E խմբում հանդես եկող «Դնեպրը», որ նախորդ տուրում արդեն ապահովել էր ուղեգիրը, 4-1 հաշվով հաղթեց «Պանդուրիին»: Խմբի առաջատար «Ֆիորենտինան» գոլազուրկ ոչ-ոքի խաղաց «Պասուշի» հետ:
G խմբում կայացած սկզբունքային խաղում Կիեւի «Դինամոն» հյուրընկալվելիս 1-3 հաշվով պարտվեց բելգիական «Գենկին»: Վերջինս 11 միավորով գլխավորում է աղյուսակը: 7 միավորով 2-րդ տեղում «Դինամոն» է:
Ահա կայացած մյուս հանդիպումների արդյունքները. «Էլֆսբորգ»-«Զալցբուրգ»ՙ 0-1, «Էսբերգ»-«Ստանդարտ»ՙ 2-1, «Բորդո»-«Այնտրախտ»ՙ 0-1, ԱՊՈԵԼ-«Մաքաբի»ՙ 0-0, «Ռապիդ»-«Թուն»ՙ 2-1, «Սլովան»-«Ֆրայբուրգ»ՙ 1-2, «Սեւիլիա»-«Էշտորիլ»ՙ 1-1, «Լիոն»-«Բետիս»ՙ 1-0, «Ռիեկա»-«Վիկտորիա»ՙ 0-0, «Լեգիա»-«Լացիո»ՙ 0-2, «Տրաբզոնսպոր»-«Ապոլոն»ՙ 4-2:
