Բեյրութիցՙ ՍԴՀնչակյան կուսակցության Կենտրոնական վարչությունից ստացված հաղորդագրությունը գուժում է մեծավաստակ խմբագիր, ազգային-հասարակական գործիչ, երկար տարիներ Հնչակյան կուսակցության Կենտրոնական վարչության անդամ, 1987-1990 թթ.-ին նույն վարչության ատենապետ Ժիրայր Նաիրիի մահը, որ պատահել է նոյեմբերի 27-ին, սրտի տագնապի հետեւանքով:
Ժիրայր Նաիրին շուրջ 50 տարի խմբագրել է Հնչակյան կուսակցության կենտրոնական օրգան «Արարատ» պաշտոնաթերթը Բեյրութում: Հետագայում ձեռք է բերել Ա. Ծառուկյանի «Նայիրի» շաբաթաթերթի արտոնատիրությունը եւ մինչեւ մահ խմբագրում-հրատարակում էր այն: Նա իր կուսակցության պատվիրակն է եղել տարբեր ֆորումներում, մեծ ծառայություններ է մատուցել Սփյուռք-Հայաստան կապերի սերտացման համար, մանավանդ խորհրդային տարիներին:
Հուղարկավորությունը կատարվելու է այսօր, 30 նոյեմբերին, Անթիլիասի Սուրբ Գրիգոր Լուսավորիչ տաճարում:
Ցավակցություն
Ռամկավար ազատական կուսակցության Հանրապետական վարչությունը բազմավաստակ ազգային-կուսակցական գործիչ, բազմամյա խմբագիր Ժիրայր Նաիրիի մահվան կապակցությամբ ցավակցություն է հայտնում ՍԴՀԿ Կենտրոնական վարչությանը, համայն հնչակյաններին, ինչպես նաեւ հանգուցյալի ընտանիքին:
