Շախմատի աշխարհի թիմային առաջնության 2-րդ տուրում Հայաստանի հավաքականի մրցակիցը մասնակիցներից ամենացածր միջին վարկանիշ (2493) ունեցող Եգիպտոսի ընտրանին էր: Մեր թիմի առաջատար Լեւոն Արոնյանին այս տուրում հանգիստ էր տրամադրվել: Առաջին խաղատախտակը ներկայացնում էր Սերգեյ Մովսիսյանը, իսկ 4-րդ խաղատախտակի վրա հանդես եկավ Տիգրան Պետրոսյանը, որն էլ առաջին միավորը պարգեւեց մեր թիմին` արդեն 32-րդ քայլին հաղթելով Իբրահիմ Հասան Լաբիբին: 2-րդ միավորը Հայաստանի օգտին գրանցեց Վլադիմիր Հակոբյանը` 57-րդ քայլին մատի սպառնալիքի տակ ստիպելով հանձնվել Սամի Շոկերին: Քիչ անց Գաբրիել Սարգսյանը հաշտություն կնքեց Բասեմ Ամինի հետ` ապահովելով մեր թիմի հաղթանակը: Իսկ վերջնական հաշիվն (3-1) արձանագրեց Սերգեյ Մովսիսյանը` 93-րդ քայլին հաշտություն կնքելով Մոհամեդ Էզատի հետ:
Այսօր կայանալիք 3-րդ տուրում Հայաստանի հավաքականը կմրցի ԱՄՆ-ի ընտրանու հետ, որը շատերի համար անսպասելիորեն 3:1 հաշվով հաղթեց ռուսներին: Առաջին խաղատախտակի վրա Նակամուրան հաղթեց Կրամնիկին: Վարուժան Հակոբյանը մրցախաղին չմասնակցեց: Ադրբեջանի հավաքականն էլ նույնպիսի հաշվով պարտության մատնեց հոլանդացիներին, գերմանացիներն էլ առավելության հասան թուրքերի նկատմամբ: Ուկրաինացիները 2,5-1,5 հաշվով հաղթեցին Չինաստանի հավաքականին:
2 տուրից հետո 4-ական միավորով առաջատարներն են Ուկրաինայի, Գերմանիայի եւ Ադրբեջանի հավաքականները: Հայ շախմատիստները 3 միավորով 4-րդ տեղում են:
