Ֆուտբոլի Հայաստանի ֆեդերացիան շարունակում է ազգային հավաքականի գլխավոր մարզչի որոնումներըՙ բանակցելով մի շարք մասնագետների հետ: Նրանցից մեկը 51-ամյա արգենտինացի Գուստավո Ալֆարոն է, որը դեկտեմբերին ժամանելու է Երեւանՙ ծանոթանալու ֆուտբոլային ենթակառուցվածքներին: Այս մասին «Արմենիա» հեռուստաընկերությանը հայտնել է ՀՖՖ նախագահ Ռուբեն Հայրապետյանը: Վերջինս նշել է, որ Հայաստանի հավաքականի նոր գլխավոր մարզչի առջեւ խնդիր է դրվելու Եվրո-2016-ի եզրափակիչ փուլի ուղեգիր նվաճել:
Գուստավո Ալֆարոն ծնվել է 1962-ի օգոստոսի 14-ին Արգենտինայի Ռաֆայելա քաղաքում: Նա իր ֆուտբոլային կարիերան սկսել է այդ քաղաքի «Ատլետիկոյում», որտեղ հանդես է եկել 1988-1992-ին կիսապաշտպանական օղակում: Թիմում անցկացրած 126 հանդիպումներում նա 6 գոլի հեղինակ է դարձել:
1992-ին 30 տարեկանում ավարտելով ֆուտբոլիստի կարիերան, Գուստավո Ալֆարոն նույն թիմում անցել է մարզչական աշխատանքի: Հետագայում արգենտինացի մասնագետը մարզել է արգենտինական «Պատրոնատո», «Քյուիլմես», «Բելգրանո», «Սան Լորենցո», «Արսենալ» եւ «Ռոսարիո» թիմերը: 2009-ին նա կարճ ժամանակ գլխավորել է Սաուդյան Արաբիայի «Ալ Ահլին»:
2010-ից Ալֆարոն «Արսենալի» գլխավոր մարզիչն է: 2012-ին նա թիմին երկրի գավաթակրի եւ սուպերգավաթակրի տիտղոսներին է արժանացրել: Նույն թվականին «Արսենալը» դարձել է Արգենտինայի գարնանային առաջնության հաղթող:
Եթե Ալֆարոյի թեկնածությունը հաստատվի, ապա նա կդառնա ՀՀ ազգային հավաքականը գլխավորած արգենտինացի 2-րդ մարզիչը: Հիշեցնենք, որ 2002-ին հավաքականի ղեկը վստահվել էր արգենտինացի Օսկար Լոպեսին, որի օրոք մեր ֆուտբոլիստները ոչ-ոքի (2-2) խաղացին ուկրաինացիների հետ եւ պարտվեցին հույներին:
