Վ. Պ.
Նոյեմբերի 17-ին արտգործնախարար Էդվարդ Նալբանդյանը եւ էներգետիկայի ու բնական պաշարների նախարար Արմեն Մովսիսյանը ներկա են գտնվել Վրաստանի նորընտիր նախագահ Գեորգի Մարգվելաշվիլիի երդմնակալության արարողությանը:
Հանդիսավոր արարողության ավարտից հետո Գեորգի Մարգվելաշվիլին ընդունել է Հայաստանի արտգործնախարար Էդվարդ Նալբանդյանին ու էներգետիկայի եւ բնական պաշարների նախարար Արմեն Մովսիսյանին: Արտգործնախարար Էդվարդ Նալբանդյանը Վրաստանի նախագահ Գեորգի Մարգվելաշվիլիին է փոխանցել Հայաստանի նախագահ Սերժ Սարգսյանի շնորհավորանքն ու Հայաստան այցելելու հրավերը:
Գեորգի Մարգվելաշվիլին գոհունակություն է հայտնել Հայաստանի եւ Վրաստանի բարձր մակարդակի հարաբերությունների կապակցությամբ` վստահություն հայտնելով, որ երկուստեք ջանքերով հնարավոր է դրանք առավել խորացնել եւ ամրապնդել:
Զրուցակիցները քննարկել են հայ-վրացական երկկողմ հարաբերություններին, տնտեսական համագործակցությանը, միջկառավարական հանձնաժողովի առաջիկա նիստին, միջխորհրդանական փոխգործակցությանը, ինչպես նաեւ վիրահայությանը առնչվող հարցեր:
Նույն օրը Էդվարդ Նալբանդյանն ու Արմեն Մովսիսյանը հանդիպել են Վրաստանի վարչապետ Բիձինա Իվանիշվիլիի հետ:
Հանդիպումներին ներկա է եղել Վրաստանում Հայաստանի դեսպան Հովհաննես Մանուկյանը:
Նոյեմբերի 17-ի առավոտյան տեղի է ունեցել Հայաստանի եւ Վրաստանի արտգործնախարարներ Էդվարդ Նալբանդյանի եւ Մայա Փանջիկիձեի առանձնազրույցը, անդրադարձել են հայ-վրացական հարաբերությունների օրակարգային հարցերին:
