Նոյեմբերի 9-ին ԱՄՆ-ի Կորպուս Քրիստի քաղաքում կկայանա քաշային 2 կարգերում աշխարհի նախկին չեմպիոն, 37-ամյա Վախթանգ Դարչինյանի եւ քաշային 3 կարգերում աշխարհի նախկին չեմպիոն, 30-ամյա Նոնիտո Դոների երկար սպասված մենամարտը:
2007-ին նրանց միջեւ կայացած առաջին մենամարտում Վախթանգ Դարչինյանն անսպասելիորեն 5-րդ ռաունդում նոկաուտի էր ենթարկվել: Դրանից հետո Վախթանգը բազմիցս մարտահրավեր էր նետել ֆիլիպինցի բռնցքամարտիկին ռեւանշ-մենամարտ անցկացնելու համար, սակայն ամեն անգամ տարբեր պատրվակներով Նոնիտո Դոները հրաժարվել էր Դարչինյանի հետ հանդիպելուց: Եվ ահա վերջապես երկար սպասված մենամարտը կայանալու է:
Բնականաբար, հայ բռնցքամարտիկը մարտականորեն է տրամադրված եւ անպայման ձգտելու է ռեւանշի: Դարչինյանն ինչպես միշտ վստահ է իր ուժերին. «Ես անպայման նոկաուտի եմ ենթարկելու Դոներին: Ես նրանից ավելի լավ եմ մենամարտում, մեծ էներգիա ունեմ, հաղթելու վճռականությունս էլ անսահման է: Պատրաստվում եմ ռինգ դուրս գալ ու ոչնչացնել նրան: Ցանկանում եմ ողջ աշխարհին ապացուցել, որ այս մենամարտին շատ երկար եմ սպասել ու պատրաստ եմ հաղթել: Վեց տարի առաջ ես չգիտեի նրան, քչերն էին նրա մասին լսել: Շատերն են համոզված, որ եթե այդ չարաբաստիկ հարվածը չլիներ 6 տարի առաջ, ես նրան կհաղթեի: Նա իմ պարտությամբ հայտնի դարձավ: Նա վախկոտ «ճուտիկ» է եւ դա ես կապացուցեմ ռինգում: Տեղյակ եմ, թե նա ինչպես է վախենում իմ հարվածներից: Ես եմ նրան ստեղծել, ինքս էլ նրան թոշակի կուղարկեմ»:
Վախթանգ Դարչինյանի համար այս մենամարտը կլինի 46-րդը պրոֆեսիոնալ ռինգում: Հայ բռնցքամարտիկը տոնել է 39 հաղթանակ, մեկ մենամարտ ավարտել է ոչ-ոքի, կրել է 5 պարտություն:
Վերջին 2 10-ռաունդանոց մենամարտերում Դարչինյանը հաղթել է: Վերջին անգամ Վախթանգը ռինգ է դուրս եկել այս տարվա մայիսի 11-ին: ԱՄՆ-ում անցկացրած մենամարտում նա 4-րդ ռաունդում տեխնիկական նոկաուտով հաղթել է Խավիեր Գալոյին:
Նոնիտո Դոները 33 մենամարտերից 31-ում հաղթել է, 2-ում պարտվել է:
