Ֆուտբոլի Ռուսաստանի գավաթի 1/16 եզրափակիչ խաղում բրազիլացի Մարկոս Պիզելին վերջապես խաղադաշտ դուրս եկավ «Կրասնոդարի» մեկնարկային կազմում ու մեծ ներդրում ունեցավ «Դոլգոպրուդնիի» նկատմամբ հյուրընկալվելիս տոնած հաղթանակում (4-1): Հանդիպման 17-րդ րոպեին Մարկոսը տուգանային հարվածով կրկնապատկեց հաշիվը, իսկ խաղավերջում խփեց 4-րդ գնդակը: Գուցե Մարկոսի արդյունավետ խաղը ստիպի «Կրասնոդարի» մարզիչներին վերականգնելու վստահությունը ՀՀ հավաքականի կիսապաշտպանի նկատմամբ ու նրան հաջորդ հանդիպումներում ավելի մեծ խաղաժամանակ հատկացնեն:
Գավաթի մրցաշարում պայքարը կշարունակի նաեւ Մոսկվայի «Սպարտակը», որը Յարոսլավլում 1-0 հաշվով հաղթեց «Շիննիկին»: Այդ հանդիպմանը «Սպարտակի» կազմում մասնակցեց միայն Արաս Օզբիլիսը, իսկ ահա Յուրա Մովսիսյանը վնասվածքի պատճառով Յարոսլավլ չէր մեկնել: Նա մարզումների ժամանակ վնասել է ոտնաթաթը ու հնարավոր է, որ հաջորդ հանդիպումն էլ բաց թողնի:
Եկատերինբուրգի «Ուրալն» առանց Արթուր Սարկիսովի եւ Էդգար Մանուչարյանի 11 մ հարվածներով 3-5 հաշվով պարտվելով «Տոսնոյին» (հիմնական եւ լրացուցիչ ժամանակում դարպասները մնացել էին անառիկ), դուրս մնաց մրցաշարից: Պրեմիեր լիգայի մի քանի ակումբներՙ «Զենիթը», Մոսկվայի «Դինամոն» ու «Լոկոմոտիվը», «Ռուբինը», «Վոլգան», «Ամկարը» եւս դուրս մնացին ՌԴ գավաթի խաղարկությունից:
