30-ամյա Կարո Մուրադին չհաջողվեց Բեռնարդ Հոպկինսից խլել IBF-ի վարկածով կիսածանրքաշային կարգում աշխարհի չեմպիոնի տիտղոսը: ԱՄՆ-ի Ատլանտիկ Սիթի քաղաքում կայացած մենամարտում 48-ամյա Հոպկինսը հաջողությամբ պաշտպանեց չեմպիոնական գոտինՙ հաղթելով միավորներով (119-108, 119-108, 117-110):
Մենամարտի ընթացքում Կարո Մուրադը վնասվածք ստացավ: Հոպկինսը փորձում էր հայ բռնցքամարտիկի մարտավկաներին համոզել, որ դադարեցնեն մենամարտը, սակայն վերջիններս չհամաձայնվեցին:
«Բեռնարդը լավ բռնցքամարտիկ է: Համոզված եմ, որ եթե վնասվածք չստանայի, ապա ավելի լավ հանդես կգայի ու կկարողանայի հաղթել», հայտարարել է Մուրադը:
«Ցանկանում էի նոկաուտի ենթարկել Կարո Մուրադին, սակայն նա «ամուր ընկույզ» էր: Ես մի փոքր արյունոտվեցի, ինչը ցանկանում էին տեսնել մարզասերները: Ուրախ եմ, որ Մուրադն ինձ ջղայնացրեց: Եվ չնայած նրա ձախ աչքի տակը պատռվել էր, սակայն շարունակում էի հարվածել մրցակցիս», մենամարտից հետո նշել է Բեռնարդ Հոպկինսը:
Այս հաղթանակից հետո Հոպկինսը եւս մեկ ռեկորդ սահմանեց: Նա դարձավ ամենատարեց բռնցքամարտիկը, որին հաջողվեց պաշտպանել աշխարհի չեմպիոնի իր տիտղոսը: Մենամարտի օրը նա 48 տարեկան 9 ամսական էր: Նախորդ ռեկորդը պատկանում էր Ջորջ Ֆորմանին, որը տիտղոսը պաշտպանել էր 46 տարեկան 3 ամսականում:
Կարո Մուրադը 28-րդ մենամարտն անցկացրեցՙ կրելով 2-րդ պարտությունը պրոֆեսիոնալ ռինգում: Հոպկինսի համար հերթական մենամարտը 64-րդն էր, որում լեգենդար բռնցքամարտիկը 54-րդ հաղթանակը տոնեց:
