Ռուսաստանցի սահմանապահները սկսել են փշալարեր անցկացնել Ուկրաինայի սահմանի վրա, հաղորդում է ԻՐՏԱ հեռուստաալիքը:
Փշալարային կառուցվածքներ ի հայտ են եկել մասնավորապես Լուգանսկի մարզում: Թե դրանք կոնկրետ երբ են ստեղծվել, չի հաղորդվում: Ընդգծվում է, որ ռուսաստանցիների նախաձեռնությունը չի ուրախացրել տեղաբնակներին, որոնք անցյալում փաստորեն անարգել հատում էին սահմանը: Բանն այն է, որ ուկրաինացիներից շատերը մերձավոր ազգականներ ունեն ՌԴ սահմանամերձ գյուղերում: Հիմա նրանց տեսնելը զգալիորեն դժվարացել է:
Հեռուստաալիքի տվյալներով, ավելի վաղ Ռուսաստանը եւ Ուկրաինան պայմանավորվել էին Լուգանսկի մարզում սահմանամերձ շրջանների բնակիչների համար պարզեցված անցակետի ստեղծման վերաբերյալ, բայց նախագիծը այդպես էլ չէր իրագործվել ֆինանսավորման պակասի պատճառով:
Ինչպես նշում է «Տրանսպորտային ռազմավարությունների կենտրոնը», սահմանային գյուղերում իրավիճակի փոփոխությունը կարող է պայմանավորված լինել Եվրոմիության հետ ասոցիացման համաձայնագիր ստորագրելու պաշտոնական Կիեւի մտադրության հետ: Ավելի վաղ Ռուսաստանը քանիցս քննադատել էր այդ ծրագրերը, Ուկրաինային առաջարկելով դառնալ Մաքսային միության լիիրավ անդամ (ներկայումս ունի դիտորդի կարգավիճակ):
Ռուս-ուկրաինական ցամաքային սահմանի երկարությունն ավելի քան 2 հազար կիլոմետր է: Երկու երկրների արտգործնախարարները սահմանագծման համաձայնագիր էին ստորագրել 2010-ի մայիսի 17-ին Կիեւում: 2012-ի նոյեմբերին Չեռնիգովի մարզումՙ «Սենկովկա» ավտոմոբիլային անցակետի մոտ, տեղակայվել էր առաջին սահմանային սյունը:
