Հայաստանի արդյունաբերողների եւ գործարարների (գործատուների) միությունը (ՀԱԳՄ) երեկ հայտարարությամբ ողջունել է Հայաստանի կառավարության որոշումը ավիացիայի ոլորտի ազատականացման եւ «բաց երկնքի» քաղաքականության անցնելու մասին: Հայտարարության մեջ մասնավորապես նշվում է.
«Հոկտեմբերի 23-ին ՀՀ կառավարությունն ընդունել է ՀՀ մրցունակ եւ շարունակական օդային փոխադրումների ծառայությունների մատուցման ապահովման ծրագիրը հաստատելու, ծրագրի իրականացումն ապահովող աշխատանքային խումբ ստեղծելու եւ դրա կազմը հաստատելու որոշում: Ծրագրի շրջանակում գնահատվել են բազմաթիվ նախագծային տարբերակներ: Բացահայտվել է, որ բաց երկնքի քաղաքականությունը կունենա ամենամեծ դրական ազդեցությունը տնտեսության, աշխատատեղերի ստեղծման, ուղեւորների քանակի աճի եւ ավիափոխադրումների սակագնի իջեցման վրա:
ՀՀ արդյունաբերողների եւ գործարարների (գործատուների) միությունը ողջունում է ՀՀ կառավարության այդ որոշումը, որը հավասարակշռված ու շահեկան քայլ է մեր երկրի տնտեսության զարգացման նոր տրամաբանության եւ նոր իրողությունների առումով: Մենքՙ գործարարներս, համոզված ենք, որ «Բաց երկնքի» քաղաքականությունը նպաստելու է հատկապես արտահանումների ակտիվացմանը, տուրիզմի զարգացմանը եւ այն ամենին, ինչը այսօր կարող է զորակցել գործարարներիս արտաքին տնտեսական կապերի աշխուժացման եւ ծավալման գործում»:
