ՀՀ ԳԱԱ Տեղեկատվական-վերլուծական կենտրոն
ՀՀ Գիտությունների ազգային ակադեմիայի հիմնադրման 70-ամյակի կապակցությամբ ԳԱԱ-ին շնորհավորական ուղերձներ են հղել արտասահմանյան գիտությունների ակադեմիաները եւ միջազգային գիտական կենտրոնները: «Երկրի զարգացման եւ տաղանդավոր գիտնականների սերունդների պատրաստման ու դաստիարակման հարցում մեծ ներդրում ունեցող Հայաստանի գիտությունների ազգային ակադեմիայի պատմական նշանակությունը դժվար է գերագնահատել: Ակադեմիան ոչ միայն զարգացրել է գիտությունը տարածաշրջանում, այլեւ ամրապնդել է գիտական եւ մշակութային կապերը ինչպես միության հանրապետությունների միջեւ ԽՍՀՄ-ի ժամանակներում, այնպես էլ պետությունների միջեւ մեր ժամանակներում ` թողնելով խոր հետք պատմության էջերում: ՀՀ ԳԱԱ-ն այժմ էլ ծառայում է աշխարհով մեկ մշակույթի եւ առաջընթացի իդեալների տարածմանը »,- նշված է Համալսարանների եվրասիական ասոցիացիայի ուղերձում:
ՀՀ ԳԱԱ-ին իրենց շնորհավորական նամակներն եւ ուղերձներն են ուղղել նաեւ Գիտությունների ակադեմիաների համաեվրոպական ասոցիացիան (Allea), Ռուսաստանի, Ավստրիայի, Բուլղարիայի, Ռումինիայի, Սերբիայի, Ուկրաինայի, Բելառուսի, Վրաստանի, Լատվիայի, Լիտվայի, Էստոնիայի, Մոլդովայի, Տաջիկստանի, Ուզբեկստանի, Ղրղզստանի գիտությունների ակադեմիաները, Ռուսաստանի գիտությունների ակադեմիայի Կոտելնիկովի անվան ռադիոէլեկտրոնիկայի ինստիտուտը, Վավիլովի անվան բնագիտության եւ տեխնիկայի պատմության ինստիտուտը, Ռուսաստանի կրթության ակադեմիան, Ռուսաստանյան բանկերի ասոցիացիան, ՊՈ-Արաքս մշակութային ընկերակցությունը Վենետիկից:
ՀՀ ԳԱԱ-ի 70-ամյա հոբելյանը ողջունել են Երեւանի պետական համալսարանը, Երեւանի ճարտարապետության եւ շինարարության պետական համալսարանը, Երեւանի պետական բժշկական համալսարանը, Հայաստանի ազգային ագրարային համալսարանը:
ՀՀ ԳԱԱ-ի 70-ամյա հոբելյանին նվիրված միջոցառումներին զուգահեռ` Երեւանի պետական համալսարանի Սարգիս եւ Մարի Իզմիրլյանների անվան գիտական գրադարանի ճեմասրահում կազմակերպվել է ցուցահանդես:
