Երեւանի «Միկայի» շախմատի կանանց թիմը հաղթանակով մեկնարկեց եվրոպական գավաթների խաղարկությունումՙ 3-1 հաշվով առավելության հասնելով Վիլնյուսի ՄՌՈւ-ի նկատմամբ: Թիմի հաղթանակն ապահովեցին 3-րդ եւ 4-րդ խաղատախտակների վրա հանդես եկած Էլինա Դանիելյանն ու Լելա Ջավախիշվիլին, որոնք պարտության մատնեցին համապատասխանաբար Դոմինիկա Բատկովսկայտեին եւ Գինտարե Պաուլաուսկայտեին: Իսկ առաջին 2 խաղատախտակների վրա հանդես եկող Հարիկա Դրոնավալին ու Լիլիթ Մկրտչյանը հաշտություն կնքեցին համապատասխանաբար Դեյմանտե Դաուլիտեի եւ Սալոմեյա Զակսայտեի հետ:
2-րդ տուրում «Միկան» կմրցի չեմպիոնի տիտղոսի գլխավոր հավակնորդ Մոնտե Կառլոյի թիմի հետ, որում հանդես են գալիս աշխարհի ներկայիս չեմպիոնուհի Հոու Յիֆանը, Համպի Կոներուն, Աննա Մուզիչուկն ու Պիա Կրամլինգը: Մեկնարկային տուրում Մոնտե Կառլոյի թիմը 4-0 հաշվով հաղթեց ԲԱՍ-ին: «Յուգրայի» հետ Մոնտե Կառլոյի թիմը գլխավորում է աղյուսակը: «Միկան» 3 միավորով 4-րդ տեղում է:
Տղամարդկանց մրցաշարում Սանկտ Պետերբուրգի թիմը, որի կազմում է Սերգեյ Մովսիսյանը, 5,5-0,5 հաշվով հաղթեց «Բարբիկանին»: Մովսիսյանը 2-րդ խաղատախտակի վրա հաղթեց Մարկ Ֆերգյուսոնին: 5,5 միավորով Սանկտ Պետերբուրգի թիմը 6-րդ տեղում է:
