«Էրեբունի» բժշկական կենտրոնից, որտեղ դեռ մեկ շաբաթ կմնա Վարդան Պետրոսյանը, «Ազգ»-ին տեղեկացրին, որ դերասանի վիճակը գնահատվում է կայուն ծանր, սակայն կյանքին վտանգ չի սպառնում: Եթե ամեն ինչ լավ ընթանա եւ հետվիրահատական բարդություններ չառաջանան, ապա 2 օրից նրան կտեղափոխեն հիվանդասենյակ, իսկ մեկ շաբաթից դուրս կգրեն հիվանդանոցից:
Ավտովթարից հետո դերասանի մոտ սկսվել էր ներքին արյունահոսություն, պատռվել էին փայծաղն ու լյարդը: Բժիշկները վիրահատել են լյարդն ու հեռացրել փայծաղը: Ամբողջ գիշեր նրան միացրած է եղել արհեստական շնչառություն, սակայն երեկ երեկոյան Պետրոսյանի առողջական վիճակը փոխվել է դեպի դրականը. դերասանը սկսել է շնչել առանց սարքի օգնության: Ըստ բժիշկներիՙ դերասանն այն տարիքում է, որ փայծաղի հեռացումը վտանգավոր չէ. կան այլ արյունաստեղծ օրգաններ, որոնք կարող են կատարել փայծաղի ֆունկցիաները:
Վարդան Պետրոսյանը «Էրեբունի» բժշկական կենտրոն էր տեղափոխվել հոկտեմբերի 20-ին Կոտայքի մարզում տեղի ունեցած վթարի հետեւանքով: Եղվարդ-Երեւան ճանապարհին միմյանց էին բախվել երկու մեքենա, 7 հոգի մարմնական տարբեր վնասվածքներով տեղափոխվել էին հիվանդանոց: Վթարի հետեւանքով մահացել են Էդգար եւ Էդուարդ Հակոբյանները: Մյուսների վիճակը գնահատվում է ծանր:
