Համաշխարհային մեծության երաժիշտ, ԽՍՀՄ ժողովրդական արտիստ Վլադիմիր Սպիվակովի նոյեմբերին կայանալիք այցը Հայաստան հավակնում է դառնալ այս աշնան ամենակարեւոր մշակութային իրադարձություններից մեկը: Անվանի երաժիշտը եւ Ռուսաստանի ազգային ֆիլհարմոնիկ նվագախումբը մեր երկիր են ժամանելու «Արամ Խաչատրյանի» միջազգային փառատոնի շրջանակներում: Նախանշված առաջին համերգը կկայանա Երեւանի «Արամ Խաչատրյան» համերգասրահում նոյեմբերի 10-ին, երկրորդը` նոյեմբերի 11-ին Գյումրիի դրամատիկական թատրոնում: «Երեւանյան համերգը նվիրվելու է Հայաստանի կամերային նվագախմբի հիմնադիր Զարեհ Սահակյանցի հիշատակին»,- «Արմենպրես»-ի թղթակցի հետ զրույցում նշեց «Արամ Խաչատրյան» մշակութային հիմնադրամի գործադիր տնօրեն Աննա Տեր-Հովակիմյանը:
Նրա խոսքով` կայանալիք համերգների ընթացքում հանդես են գալու հրաշալի մենակատարներ հետաքրքրական ծրագրով: «Վլադիմիր Սպիվակովի հետ Հայաստան կվերադառնա նաեւ դաշնակահար Ալեքսանդր Ռոմանովսկին, ով Հայաստանի պետական երիտասարդական նվագախմբի հետ ելույթ ունեցավ հոկտեմբերի 17-ին»,- պատմեց Տեր-Հովակիմյանը: Նա տեղեկացրեց, որ Գյումրիում կայանալիք համերգը բարեգործական է լինելու: Դա պայմանավորված է նաեւ այն առանձնահատուկ վերաբերմունքով, որը տածում է մաեստրո Սպիվակովը Գյումրիի հանդեպ: «Կարծում եմ շատ սպասված համերգներ են լինելու»,- հավելեց հիմնադրամի գործադիր տնօրենը:
Ռուսաստանի ազգային ֆիլհարմոնիկ նվագախումբըՙ Սպիվակովի գլխավորությամբ նոյեմբերի 10-ին կներկայացնի դասական երաժշտության երեկո: Համերգի ընթացքում կատարումներով հանդես կգան Ալեքսանդր Ռոմանովսկին (դաշնամուր, Ուկրաինա/Իտալիա), Վասիլիա Լադյուգան (բարիտոն, Ռուսաստան), Ջուլիետա Գալստյանը (մեցցո-սոպրանո, Շվեյցարիա) եւ Գեւորգ Հակոբյանը (բարիտոն, Հայաստան):