ՌԴ դաշնային խորհրդի անդամ, Բաշկիրիայի Ազգային ժողովի նախկին փոխխոսնակ Ռաֆայիլ Զինուրովը չափածո գրել է հայոց պատմությունը` «Հայաստան, հազարամյակների ուղի» վերնագրով: Այն եռահատոր պոեմ է, որտեղ ներառվել են Հայոց պատմության բոլոր արժանահիշատակ իրադարձությունները: Զինուրովը շքեղ ձեւավորված եռահատորին որպես հեղինակային անուն հայկական ազգանուն է ընտրել` Ուֆաեցի, այնքան որ իրեն նույնացած է զգացել այլ կրոնի ներկայացուցիչ, մասնագիտությամբ իրավաբան այս մարդը հայոց պատմության թվականներով չափածո դեգերելիս: Երեկ նրա եռահատորի (երրորդը դեռ նոր է լույս տեսնելու) շնորհանդեսն էր Ազգային ժողովում, նրան ու նրա գիրքը սիրով ներկայացրին ԱԺ փոխխոսնակ Էդուարդ Շարմազանովը , պատգամավոր Տաճատ Վարդապետյանը , գրքի առաջաբանը գրող պատմաբան Աշոտ Մելքոնյանը : Պատմական արժեք ներկայացնող բացառիկ աշխատություն (չնայած հեղինակը պրոֆեսիոնալ պատմաբան չէ), պատմությունը ներկայացրել է` պահպանելով ժամանակագրությունը մինչեւ նորագույն պատմություն, օգտվել բազմաթիվ, այդ թվում հայկական սկզբնաղբյուրներից: Բաշկիր հեղինակի եռագրությունը ծնվել է հայերի հանդեպ մեծ սիրուց, այս էր Շարմազանովի ջերմ ելույթի մոտիվը: Հայ ժողովրդի լավագույն բարեկամ անվանեց Զինուրովին Ա. Մելքոնյանը, իսկ Տ. Վարդապետյանը նրան դրեց հայ ժողովրդի շատ յհայտնի բարեկամների` Նանսենի, Վերֆելի, Սախարովի կողքին:
Ինքը, Զինուրովը նույնպես շատ ջերմ խոսեց` նախ հայերեն, «ախպերության» մասին, հետո անցավ ռուսերենի, ասելով, որ իր համար պատիվ է հայ ժողովրդի ու հայերի մասին գրելը:
Եռահատորը դեռ շնորհանդես է ունենալու Մոսկվայում, սակայն այդ աշխատանքի մասին արդեն Ռուսաստանում խոսում են:
