Սանկտ Պետերբուրգում ավարտված շախմատի Միխայիլ Չիգորինի հուշամրցաշարում հայ շախմատիստներից լավագույն արդյունքը ցույց տվեց Վլադիմիր Հակոբյանը, որը 9 հնարավորից վաստակած 6,5 միավորով գրավեց 12-րդ տեղը: 7-րդ տուրում Հակոբյանը 2-րդ անընդմեջ պարտությունը կրեց Վիտալի Բեռնադսկու հետ պարտիայում, իսկ ավարտական 2 մրցախաղերում հաղթեց Դմիտրի Ռոժկոյին եւ Տալ Բարոնին:
Մրցաշարի հաղթող ճանաչվեց ուկրաինացի գրոսմայստեր Պավել Էլյանովը, որը 10 շախմատիստների հետ վաստակեց հավասարՙ 7 միավոր: Նա մրցակիցներին գերազանցեց լրացուցիչ գործակիցներով:
Ռոբերտ Հովհաննիսյանը 6,5 միավորով գրավեց 21-րդ տեղը, Զավեն Անդրեասյանը 6 միավորով 36-րդն է: 5-ական միավոր վաստակեցին Վահե Բաղդասարյանը (90-րդ տեղ), Արմեն Անտինյանը (108-րդ) եւ Աննա Հայրապետյանը (113-րդ):
