Նորաբաց «Diplomat» ակումբն այսուհետեւ հասարակության լայն շերտերին կներկայացնի դիվանագիտություն հասկացությունն, ու թե այն ինչ ճանապարհով է զարգանում մեր հանրապետությունում: Ակումբի ներկայացուցիչ Արման Նավասարդյանի ներկայացմամբՙ կառույցը ապագաղափարախոսական եւ վերկուսակցական է: «Մենք չենք հարում ոչ մի քաղաքական հոսանքի եւ չենք կատարում ոչ մեկի պատվերը: Մեր ուղեգիծն օբյեկտիվությունն է», ասաց Նավասարդյանըՙ հավելելով, որ ակումբն ակտիվորեն աշխատելու է Հայաստանում դիվանագիտական կորպուսի ներկայացուցիչների եւ դեսպանատների հետ, որոնց ներկայացուցիչները, դեսպանները պարբերաբար կլինեն ակումբի հյուրերը:
Ակումբի բացմանը ներկա էր նաեւ ՀՀ-ում ԻԻՀ դեսպանի առաջին խորհրդական Խոլամ Ռեզան , ում գնահատմամբՙ Հայաստանի դիվանագիտական համայնքում նման ակումբի գործունեությունը շատ էր զգացվում, եւ հույս հայտնեց, որ Հայաստանում հավատարմագրված տարբեր երկրների դեսպաններն ակումբի շրջանակներում կներկայացնեն իրենց երկրների դիրքորոշումները տարբեր հարցերում:
