Ֆուտբոլի Հայաստանի երիտասարդական հավաքականը Եվրոպայի առաջնության ընտրական մրցաշարում 2-րդ անընդմեջ պարտությունը կրեցՙ 1-2 հաշվով զիջելով ղազախներին: Եթե 4 օր առաջ ֆրանսիացիներից կրած պարտությունը օրինաչափ էր, քանի որ մրցակիցն, իրոք, շատ ուժեղ էր, ապա այս անգամ անհաջողությունում մեղավոր էին մեր ֆուտբոլիստները, որոնք չկարողացան իրենց դրսեւորել ինչպես հարկն է:
Թեեւ 1-ին խաղակեսում մերոնք բավականին ակտիվ էին, սակայն այդպես էլ չկարողացան գոլային լուրջ պահեր ստեղծել մրցակցի դարպասին: Իսկ ահա հյուրերը հազվադեպ հակագրոհներից մեկի ժամանակ 31-րդ րոպեին հասան հաջողության: Աջ թեւից տուգանային հրապարակ կատարած փոխանցումից հետո, հսկողությունից դուրս մնացած Ռոման Մուրթազաեւը գրավեց դարպասը:
Ընդմիջումից անմիջապես հետո մեր ֆուտբոլիստներին հաջողվեց վերականգնել հավասարակշռությունը: Խառը իրադրությունում աչքի ընկավ Դավիթ Հակոբյանը: Խփած գոլից հետո մեր ֆուտբոլիստները բավականին ակտիվացան եւ կարող էին նոր հաջողության հասնել: Սակայն Աղվան Պապիկյանը նպաստավոր դիրքից վրիպեց, իսկ Կարեն Մուրադյանի հեռահար հարվածից հետո հյուրերին փրկեց դարպասապահ Ստաս Պոկատիլովը:
Երկրորդ խաղակեսում էլ ղազախները հաջողակ գտնվեցին: 73-րդ րոպեին տուգանայինի խաղարկումից հետո Աբզալ Բեյսեբեկովը խփեց հաղթական գնդակը: Այսպես Ղազախստանի հավաքականը ռեւանշի հասավ հայերի նկատմամբ սեփական հարկի տակ կրած 0-1 հաշվով պարտության դիմաց:
