Իրանի նախագահ Հասան Ռուհանիի վարչակազմը հոկտեմբերի 11-ին չեղյալ է հայտարարել ամենամյա հակաիսրայելական կոնֆերանսը, որը Թեհրանում ավանդաբար անցկացվում է 2005 թվականից: Այդ մասին հաղորդում է Ասոշիեյթեդ պրես գործակալությունը:
Իրանի ղեկավարությունը հասկացրել է, որ կոնֆերանսը վերացվում է նոր իշխանությունների արտաքին քաղաքականությանը չհամապատասխանելու պատճառով: Ներկայիս իշխանությունները ջանում են «գտնել արտաքին աշխարհի հետ բնականոն փոխգործողության ուղիներ»:
Երկրի պահպանողականները արդեն դատապարտել են Ռուհանիի որոշումը, կոնֆերանսի վերացումն անվանելով «աղետ» եւ «հսկայական սխալ»: Միջոցառման կազմակերպիչները նշում են, որ «Նոր հորիզոններ» կոնֆերանսը խոշորագույն հակասիոնիստական ձեռնարկումն էր, որի վերացումը բացասաբար կազդի հակաիսրայելական շարժման վրա:
2013 թ. կոնֆերանսին պատրաստվում էին մասնակցել 63 օտարերկրացի հյուրեր եւ 50 իրանցիներ: Այդ մարդկանց հրավերներ ուղարկվել էին մայիսին, երբ նախագահը դեռ Մահմուդ Ահմադինեժադն էր: Հենց նրան են համարում ամենամյա հակաիսրայելական միջոցառման գլխավոր նախաձեռնողն ու ոգեշնչողը:
«Նոր հորիզոններ» կոնֆերանսը Թեհրանում սովորաբար անցկացվում էր սեպտեմբերի վերջերին-հոկտեմբերի սկզբներին:
