ԼԻԲԱՆԱՆԻ ՀԱՅՈՑ ԹԵՄԸ ԸՆՏՐԵՑ ՆՈՐ ԱՌԱՋՆՈՐԴ
«Արաքս» շաբաթաթերթ, Թեհրան, 10 հոկտեմբերի 2013թ.
Նախկին առաջնորդի հրաժարման պատճառները թողնելով կասկած հարուցող մշուշի մեջ
Մեծի տանն Կիլիկո կաթողիկոսության կայքէջից տեղեկանում ենք, որ hոկտեմբերի 7-ին Լիբանանի հայոց թեմի ազգային երեսփոխանական ժողովը Շահե եպիսկոպոս Փանոսյանին ընտրել է թեմի նոր առաջնորդ:
Կաթողիկոսության կայքէջը ցայժմ լրատվություն չի կատարել նախկին առաջնորդիՙ Գեղամ արք. Խաչերյանի, պաշտոնից անսպասելիորեն հրաժարվելու եւ հրաժարականի պատճառների մասին, ինչը հօդս է ցնդեցնում Անթիլիասի գահակալի թափանցիկության եւ ժողովրդավարության մասին կատարած ճառերը եւ Հայ եկեղեցու առօրյայով ու ճակատագրով հետաքրքրվողների մեջ առաջացնում մեծ հարցական:
Գեղամ արք. Խաչերյանն, առաջնորդի հանգամանքում, հոկտեմբերի 6-ին, մատուցած իր վերջին պատարագի ավարտին տված քարոզում, իմիջիայլոց, շեշտել էր, որ իր առաջնորդության 18 տարիների ընթացքում իր բնաբանը եղել էՙ «կատարել ինչ որ ճշմարիտ է», եւ փորձել է այդ բնաբանը իր կյանքի, գործի, պատասխանատվության ուղեցույց դարձնել եւ կատարելՙ ինչ որ ճշմարիտ ու արդար է ժողովրդի համար:
Հիշեցնենք, Լիբանանի հայոց թեմի 51-ամյա առաջնորդ Գեղամ արք. Խաչերյանը, սեպտեմբեր 10-ին, ազգային երեսփոխանական ժողովի արտակարգ նիստում ներկայացրել էր իր հրաժարականը: Իսկ Լիբանանի ՀԹ առաջնորդարանի դիվանը որպես սրբազան հոր հրաժարականի պատճառ միայն հիշատակել էր «գերհոգնածությունը», որին, նկատի ունենալով սրբազան հոր երիտասարդ տարիքն ու աշխույժ գործունեությունը, մեղմ ասածՙ դժվար է հավատալ:
Մյուս կողմիցՙ Լիբանանի ՀԹ առաջնորդարանի դիվանապետ Աբիկ Տանակոզյանն «Առաջին լրատվական»-ի հետ զրույցում նշել է, որ «որեւէ ներքին կոնֆլիկտ չկա», եւ հավելել է, որ «ի պատիվ Գեղամ սրբազանի ճաշկերույթ ենք կազմակերպել»:
Իսկ այն հարցին, թե հնարավո՞ր է, որ Գեղամ սրբազանը այլեւս Լիբանանում չմնա, դիվանապետը պատասխանել է, որ նմանատիպ հարցերը որոշում է Արամ Ա վեհափառը, եւ նա պետք է որոշի, թե որ գաղութում ծառայություն կմատուցի սրբազան հայրը:
