Չեռնոգորիայի Բուդվա քաղաքում ընթացող շախմատի Եվրոպայի պատանեկան առաջնության 5-րդ տուրում աղյուսակը գլխավորող 3 հայ շախմատիստներն էլ առաջին միավորները կորցրին: Մինչեւ 10 տարեկանների մրցաշարի միանձնյա առաջատար Արմեն Բարսեղյանը ոչ-ոքի խաղաց Դավիթ Գավրիլեսկուի հետ ու վաստակեց 4,5 միավոր: Դա հնարավորություն տվեց Մահամադ Մուրադիին, Արսենի Նեստերովին եւ Վեգնիր Սթեֆանսոնին միավորներով հավասարվելու հայ շախմատիստինՙ նրա հետ գլխավորելով աղյուսակը: Տարիքային այս խմբում հանդես եկող Հակոբ Հակոբյանն ունի 3,5 միավոր: Նա առաջին պարտությունը կրեց Արսենի Նեստերովի հետ մրցավեճում: Նույնպիսի արդյունք ունի նաեւ Գոռ Մելքոնյանը:
Մինչեւ 16 տարեկանների մրցաշարի առաջատար Տիգրան Հարությունյանն էլ առաջին կես միավորը կորցրեցՙ հաշտություն կնքելով Դմիտրի Խեգայի հետ: Տիգրանը 4,5 միավորով Կիրիլ Ալեքսեենկոյի եւ Ալեքսեյ Զենզերայի հետ մրցաշարի առաջատարն է:
Իսկ ահա մինչեւ 18 տարեկանների մրցաշարի առաջատար Հովհաննես Գաբուզյանը 4 անընդմեջ հաղթանակներից հետո առաջին պարտությունը կրեցՙ զիջելով իր հայրենակից Կարեն Գրիգորյանին: Վերջինս եւս վաստակեց 4 միավոր: Նույնպիսի արդյունք ունի նաեւ Արման Միքայելյանը, որը հաղթեց Թոմաս Կրաուսին: Մեր եռյակը հետապնդում է 5 միավորով աղյուսակը գլխավորող իսպանացի Դավիթ Պարդոյին:
Իր մրցաշարային վիճակը զգալիորեն բարելավեց մինչեւ 14 տարեկանների մրցաշարում կայծակնային խաղի Եվրոպայի չեմպիոն Հայկ Մարտիրոսյանըՙ տոնելով 2-րդ անընդմեջ հաղթանակը Մուլեթ Ինիգո Լոպեսի նկատմամբ: Հայկը 4 միավորով հետապնդում է մրցաշարի առաջատարներ Յորդեն վան Ֆորեստին եւ Սեմյոն Էլիստրատովին, որոնք 4,5-ական միավոր են վաստակել:
Հայ շախմատիստուհիներից առավել հաջող են հանդես գալիս Մանե Ադամյանը (մինչեւ 12 տարեկաններ) եւ Անի Հարությունյանը (մինչեւ 16 տարեկաններ), որոնք վաստակել են 3,5-ական միավոր: Մանեն առաջին պարտությունը կրեց Օլգա Բադելկայի հետ մրցախաղում: Նա 11-րդ տեղում է: Առաջատարներն են 5-ական միավոր ունեցող Գաբրիելա Անտովան եւ Պոլինա Շուվալովան: Անի Հարությունյանը հաշտություն կնքեց Սառա Յակիմովիչի հետ: Անին 3,5 միավորով 8-րդ տեղում է: Նա մեկ միավոր է զիջում աղյուսակը գլխավորող Աննա Ստյաժկինային, Մարիա Բլումին ու Մարինա Կատանովային:
