ՌԴ նախորդ առաջնության լավագույն ռմբարկուներից մեկըՙ Յուրա Մովսիսյանը Մոսկվայի «Սպարտակում» էլ արդյունավետ խաղ է ցուցադրում: Առաջնության 10-րդ տուրից հետո Մովսիսյանը 5 գնդակով լավագույն ռմբարկուների ցանկում է, որը 7 գոլով գլխավորում է «Ռոստովի» հարձակվող Արտյոմ Ձյուբան:
Յուրա Մովսիսյանը 2011-ից է հանդես գալիս Ռուսաստանում եւ այդ երկրի առաջնություններում ընդհանուր առմամբ արդեն 32 գնդակ է խփել: Այս ցուցանիշը 2-րդն է ՌԴ առաջնություններում հանդես եկած հայ ֆուտբոլիստների շրջանում: Առայժմ ամենաարդյունավետը ՀՀ հավաքականի նախկին հարձակվող Գառնիկ Ավալյանն է, որը «Կռիլյա Սովետովի» կազմում 1993-1998-ին անցկացրած 187 խաղում 28 գոլ է խփել, 6 գնդակ էլ իր օգտին է գրանցել 1999-2000-ին Էլիստայի «Ուրալանում» խաղալիս: Այնպես որ Յուրա Մովսիսյանին ընդամենը 3 գոլ է անհրաժեշտ Ռուսաստանի առաջնություններում հայ լավագույն ռմբարկուի տիտղոսին արժանանալու համար:
20 գոլի հեղինակ է դարձել Անդրեյ Մովսիսյանը, 13 գոլ է խփել Ալբերտ Սարգսյանը: Արաս Օզբիլիսի հաշվին 12 գոլ է գրանցված:
Յուրա Մովսիսյանն առայժմ առավել արդյունավետ է գործել 2011/12-ի մրցաշրջանումՙ «Կրասնոդարի» կազմում անցկացրած 37 հանդիպումներում խփելով 14 գնդակ: Հաջորդ մրցաշրջանում նա 13 գոլի հեղինակ դարձավ, որից 9-ը խփեց «Կրասնոդարում», 4-ըՙ «Սպարտակում»:
