Գյումրու քաղաքապետ Սամվել Բալասանյանը երեկ ելույթ է ունեցել Չինաստանի Սիան քաղաքում բացված «Եվրասիական տնտեսական ֆորում 2013»-ի առաջին նիստում: Այս մասին քաղաքապետարանի հրապարակած պաշտոնական հաղորդագրությունում նշվում է, որ ֆորումին մասնակցելու հրավիրված հայ քաղաքապետը հանդես է եկել բացման հանդիսավոր մասի ավարտից հետո: Բացմանը հանդես են եկել ՉԺՀ կենտրոնական եւ տեղական իշխանությունների բարձրաստիճան ներկայացուցիչներ, Աֆղանստանի նախագահը, Ուկրաինայի փոխվարչապետը եւ ուրիշներ:
Բալասանյանն իր ելույթում հայ-չինական հարաբերությունների համատեքստում մանրամասն ներկայացրել է Գյումրիում չինական եւ այլ աղբյուրների ներդրումների համար առավել հավանական ուղղությունները, որոնց շարքում առանձնացրել է այլընտրանքային էներգետիկայի, բարձր տեխնոլոգիաների, տեքստիլ արդյունաբերության եւ սպորտի ոլորտները:
Նշվում է, որ օրվա ընթացքում Գյումրու քաղաքապետը ծրագրային հանդիպումներից զատ քննարկումներ է ունեցել Ուզբեկստանի, Թուրքմենստանի եւ Չինաստանի մի շարք քաղաքների իր պաշտոնակիցների հետ, կողմերը մտքեր են փոխանակել քաղաքների միջեւ համագործակցության հնարավոր ձեւաչափերի, տարբեր ոլորտներում փորձի փոխանակման հնարավորությունների մասին:
